Euskerabili

PLAZER HANDIZ

2012-01-27T21:41:00.000+01:00

500garren sarrera da gaurkoa. Ez da marka makala! Zenbaki polita, borobila eta indartsua. 500 esaten dugunean lasai asko geratzen gara, ufff! Dena eta, gainera, ondo egin dugula ematen du. BOSTEHUN, txo.

Ziur aski istorio honetan hasi ginenean ez genuen zifra honetara helduko ginela pentsatzen. Egun haietan bostehun entzutean, mendi magalean tontorrera begira dagoen mendizalearen sentsazioa izan genuen: hortxe, baina urrun.

Baina, pazientziaz eta tentuz lortzen da dena.

Gai guztiak tratatu ditugu eta batzuk behin baino gehiagotan edo modu desberdinetan. 500garren sarrerako zerbait berezia pentsatu behar orduan. Berezia bai, baina zer? Ideiarik ez. Zaila egiten zaigu gaurko sarrera zeri buruz egitea, beraz. Desiotan egon gara zenbaki honetara heltzeko eta orain ez dakigu zer idatzi.

Ez zaizue inoiz gauza bera gertatu? Gauza bat lortzeko irrikan egon eta eskuan duzuenean ezer berezirik ez . Hutsik, zer egin jakin gabe. Beharbada plazerra ez dago lorpenean, ahaleginean baizik.

KOMUNIKAZIOAREN IZENEAN

2012-01-27T21:29:00.002+01:00

Asko dira hezkuntza baten ikas-prozesuan emaniko aldaketak. Dagoeneko zahar geratu dira aspaldiko metodo haiek, buruz ikasitako pasarte haiek (ama, atea …), ikasleei zer esan nahi zuten jakin gabe arrapalada batean errepikarazten genizkienak. Zorionez, gaurko metodoetan komunikazioa da garrantzitsuena, ikasleek komunikatzen ikastea, idatziz zein ahoz entzuleari mezua helaraztea.

Hala ere, bada oso argi ez dudan kontutxo bat, komunikatze prozesu horretan hizkuntza bat galtzaile atera behar ote den, alegia. Komunikatze-prozesu horretan hizkuntzak bere nortasuna, ezaugarriak, berezitasunak galdu behar ote dituen.

Nork ez du inoiz bere hizkuntzara itzulitako idazki eskasa irakurri, hizkuntza hori idazlearen lehenengo hizkuntza ez delako edo egileak menperatzen ez duelako, edo …? Seguru nago denoi noiz edo noiz pasa zaigula eta nire zalantza da: zer egin behar da halakoetan, zuzendu? helburua komunikatzea bada eta, txarto idatzita egonda ere, kapaz izan bagara ulertzeko, onartu behar dugu?

Oharra: euskaraz hamaika adibide topa ditzakegu egoera ilustratzeko, baina aurtengo oporretan Vietnamen txango batean emandako orritxoa aproposagoa iruditu zaigu. Lastima “Charlie” hauek euskara ez jakitea, bestela xelebrea zatekeen itzulpena!

ZELAKO KONPAINIA

2012-01-20T21:45:00.001+01:00

Zoazte pikutara! Utzi bakean! Hamaika bider esan dizuet ez dudala zuen konpainiatik ezer nahi! Ni XXX konpainian nago eta gustura! Ostia! – horrelaxe (ni ezagututa imajinatu ahal dituzue tonua eta bolumena) erantzun nion pasa den astean 10.. telefono horretatik deitu zidan bati, nire ustez, bere konpainiara pasatzera gonbidatzen ninduen bati.

Barkatu, bakartu Jauna!, baina zure konpainiakoa naiz eta atera berri dugun produktu baten berri eman nahi dizut – erantzun zidan ahots gozo-gozo batek.

Antza, azkeneko zenbakiak dantzan, sakelakoan agertzen zen zenbakia gaizki ikusi nuen.Istant horretan konturatu nintzen hanka sartu nuela.

Orain, kontatzen dudanean, barre egiten dut eta balentria handia iruditzen zait, baina … (gure artean gera dadila) erabat barregarri geratu nintzen egoera horretan.
Badakit ez naizela tramankulu horregatik barregarri geratu den bakarra mundu honetan, bestela begira bideoan zer gertatu zitzaion Gaston Gaudiori partida batean.

Ziur aski, zeuek ere izango dituzue gertatutako pasadizo barregarriren bat. Horrela bada konpartitu gurekin une xelebre horiek. Kontatzeko horrelakorik ez baduzue, idatzi telefono konpainiarekin izan duzuen haserrealdiren bat.

MEGA-SEGAPOTO FASHION

2012-01-20T21:42:00.001+01:00

Oraindik ditut gogoan eskuko telefonoa ez zutela inoiz erabiliko esaten zuten haiek. Une oro lokalizatuta egotea ez omen zen haien gustukoa, baina orain urte batzuk pasata, apustu egingo nuke orduko aitzakia ezerezean geratu dela, urteekin denok harrapatu baikaitu zorioneko telefonotxo horrek.

Aitzitik, egungo hizpidea ez da telefonorik izatea ala ez, ez horixe! Oraingo ardura nagusiena merkatuko azken telefono modeloa izatea da, ordenagailu txiki horiek, ez dakit zenbat aplikazio dituzten horiek, gehienak erabiltzen ez badakigu ere. Baina, nola harrotzen gaitu edonon, edonoren aurrean, edonoiz … lortutako azken telefono hori erakusteak, merkatuko promozio onena lortu dugula esateak, ematen dizkigun beste aukera jakinarazteak !

Egia esan, oso erakargarriak dira eta oso zaila da uko egitea halako telefonoa izateari.Beraz, uste dut badela garaia orain dela ez dakit noizko telefono hori aldatzeko, metroan jotzen duen bakoitzean eta atera behar dudan bakoitzean, jendeak beste era batera begiratzeko eta haien aurpegietan errukirik ez ikusteko. Promozioak begiratzera joan beharko, orduan, ea nirea koadrilako onena den! Bai jauna!

Zuen ustez, bada eskuko telefonoa jendea bereizteko modu bat ala eskuko telefonoak ez du pertsona bat identifikatzeko balio?

EUSKAL EUROPA

2012-01-13T21:35:00.003+01:00

Urte berri honetako lehenengo egunetik Europako Hiri Berdea izango da Gasteiz. Ez da hango patatengatik izan, ez. Sari honen bidez, Arabako hiriburuak ingurumenaren eta herritarren bizi-kalitatearen alde egindako lanari errekonozimendua eman diote Europa mailan. Bejondeizuela, gasteiztarrok!

2016an Kulturaren Europar Hiriburua Donostia izango dela jakin genuen aurreko urtearen hondarrean. Ez da pintxoengatik izan, ez. Kultura sortzen, sustatzen eta gozatzen inbertitutakoaren saria da hau. Bejondeizuela, donostiarrok!

Bi izendapen hauek nabarmentzen dute Autonomia Erkidegoaren indarra eta presentzia Europa zaharrean, baina … Bilbo? Zer izan daiteke hurrengo urteotan Europan? Zein hiri izan daiteke? Harrokeriaren hiria, txakolinaren hiria, … Bada, argi dago Europako hiriburua izango da, dudarik gabe. Eta zuen ustez, zein izan ahal da? Zergatik?

EGIN SLOWKI

2012-01-13T21:30:00.002+01:00

Slow, low, fast … asko dira ingelesezko hitzez osaturiko izen mugimenduak, bai jauna, fast food, slow food, low cost … gero eta arruntagoak dira gure hizkeran. Baina bada bat, niri neuri sikiera, arrotza suertatzen zaidana, slow cities izenekoa. Izan ere, gurean bi ditugula (Mungia eta Lekeitio) irakurri izan ez banu, segur asko ez nintzatekeen enteratuko.
Antza, asko dira izen hau izan nahi duten udalerriak, baina horretarako baldintza batzuk bete behar dira: 50.000 biztanle baino gutxiago edukitzea, hiriburua ez izatea eta ingurumenarekiko begirunea izatea. Slow cities estresik gabeko bizi-kalitatea aldarrikatzen dute, tradizioari eusten diote aurrerapen teknologikoak alboratu gabe, energia berriztagarriak sustatzen dituzte, ingurumena kaltetzen dituzten lurrin isurketak murrizten dituzte …

Ez dakit, horrela esanda polita ematen du, bina Mungian bizi naizen honek, egia esan behar baldin badut, ez dut uste hango jendeak estresik ez duenik, ez beste leku batzuetakoak baino gutxiago behintzat. Agian bizilekuak baino lanlekuak izan beharko luke slow izena, ez duzue horrela uste?

KANTUKA

2011-12-23T20:45:00.004+01:00

Oraindik ere eragiten dit zirrara entzuten dudan bakoitzean. Ez dakit, baina zerbait berezia du kanta horrek. Ume mokoa nintzen entzun nuen Gabon haietan eta jai haiek eman nituen danbolin-jolearen abestia gora eta behera, familiako guztiak nazkatu arte. Orain, handitan, pare bat trago hartuta eta lotsa galduta, altxatu, ahotsa prestatu eta hasten naiz abesten bakar-bakarrik, besteek ropopopo pona egin bitartean.

Garai hauetan, ondo ezagutzen nautenek badakite postreetarako tarte bat erreserbatu behar dugula Gabon kantetarako. Eta ni irrikan berriro ume moko hori izateko.

Zein da gehien gustatzen zaizuen Gabon kanta? Zergatik? Zer gogorarazten dizue?

HORI NIRETZAT

2011-12-23T20:39:00.003+01:00

Hementxe ditugu berriro Gabonak eta hementxe dugu berriro ere ditxosozko oparien garaia. Nori zer erosi, zenbat gastatu, non lortu merkeen, … Hauexek dira egunotan guztion buruetan darabiltzagun galderak.

Gainera, denda batzuk ere igandeetan zabalik daude jendeari erosteko aukera gehiago emateko, hainbeste irabaztea kostatzen den diru hori ordu batzuetan xahutzeko makina bat aukera gure aurrean.

Hala ere, bada ulertzen ez dudan gauza bat. Alde batetik, Gabon garaian kontsumista ez izateko mezua helarazten digute, ez erosteko erosteagatik, dirua neurriz gastatzeko; baina, beste aldetik, egunotan postontzietan jasotzen dugun propagandak era guztietako eskaintzak eta maukak helarazten dizkigu. Beraz, nori egin kasu? Argi daukat , urtero bezala jarraituko dut opariak erosten, bina espero dut “subidon, subidon” izan gabe, eta gero gerokoak, ez al dira Gabonak zorion garaia, bada?

ZORIONAK ETA URTE BERRI ON!!!

HARTU ETA PASA

2011-12-16T21:44:00.004+01:00

Lo seko. Horrelaxe geratu nintzen porro bat erre nuen lehenengo aldian, bigarrenean eta hirugarrenean. Ni lo eta beste lagun guztiak poz-pozik, barrezka.

Lehenengo hartan mendian geunden. Patata tortilla bokatak irentsi eta gero, garagardo batzuk hartuta, koadrilako nagusienak starlux bezalako harritxo bat patrikatik atera zuen eta zer zen galdetu zigun. Inork ez zuen ideiarik. Marroi koloreko horri su eman, bigundu eta kontrabandozko Winston batez nahastu zuen. Aitonak erabiltzen zuen zigarreta-paperean bildu, piztu, zupada eman eta aldemenekoari pasa. Aldamenekoak, urduri baino urduriago, guztioi begiratu eta beste zupada bat eta pasa. Horrela niri ailegatu arte. Nik, Adanek bezala Evak madaria eman zionean, begiak itxi eta barruraino … Ez dut gehiago gogoratzen. Lo seko geratu nintzen.

Pare bat ordu beranduxeago esnatu nintzen kriston ajearekin, erdi zorabiatuta eta bakar-bakarrik. Putaseme horiek ospa eginda, hortxe nengoen mendi puntan. Gero enteratu nintzen eurek ere ez zekitela nola jaitsi ziren menditik herriraino. Antza, bakoitzak ahal izan zuen moduan heldu zen etxera.

Beste bietan berdin, lo eta lo; baina kanpin-denda batean eta lagun baten txaletean.

Berriro ez dut erre eta ez dut erreko. Usainak ere nazka ematen dit.

Eta, nolakoa izan zen zuen lehenengo aldia?

MARIA ETXEAN DAGO

2011-12-16T21:41:00.004+01:00

Inor ez da harritzen norbaitek etxean maria landarea daukala esaten duenean. Izan ere, nork bere kontsumorako edukitzea ez omen da delitua. Baina bakarra barik plantazioa dagonean sortzen da eztabaida, kasu honetan, dirua erraz irabaztea bilatzen baita. Hala ere, batzuen ustez, bakarra edo plantazioa edukitzeak ez dauka zerikusirik, ez bata ez bestea ez baita delitua, egunotan egunkarian kontrakoa adierazi badigute ere. Nik, egia esan, ez dakit zer pentsatu, are gehiago erabilera arautu behar dutenak ere ados jartzen ez badira beronen erabilerak terapeutikoa izan behar duen. Beraz, zer esanik ez plantazioa edukitzeari buruz.

Eta zuek, zer uste duzue?

AZALEKOA

2011-12-09T21:40:00.005+01:00

Harreman mota asko daude, baina nik neuk ez dut harreman seriorik nahi eta ez dut besteen maitasunik nahi. Gogokoa dut trago batzuk hartzeko geratzea, gustura banago zerbait afaldu eta oso gustura banago, bada horixe, …

Baina aspaldi honetan zaila da jendearekin geratzea; oso zaila da pertsona bat afaltzeko aurkitzea (nahiz eta neuk ordaindu) eta oso oso zaila, ezinezkoa, miraria da, bada horixe, …

Betiko lekuetara jo eta ezer ez. Modan daudenetara joan eta inork ez du inorekin ezer nahi. Ez dakit zergatik gertatzen den, ez dut ulertzen. Inoiz baino aukera gehiago dugu komunikatzeko eta inoiz baino inkomunikatuago gaude. Hamaika tramankulu ditugu harremanak izateko eta ez dugu teklarekin asmatzen erlazioak izateko.

Baina, ez dut etsiko! Horrexegatik nago tekla guztiak sakatzeko prest. Duela gutxi laztantxo.com ataria ikusi nuen eta, birritan pentsatu gabe, bidali nien nire perfila. Gezur bat edo beste idatzi nuen. Ez dakit inork erantzungo didan, baina zain nago, irrikan nago.

Aste honetako Interneten dauden horrelako atarietarako zuen “gezurrezko perfila” deskribatzea proposatzen dizuegu. Ez badakizue ondo nola egin, kaixomaitea.com begiratu ahal duzue. Izan zaitezte orijinalak!

ZENBAT BURU HAINBAT …

2011-12-09T21:37:00.001+01:00

Gizonek egunean hemeretzi aldiz dute sexua buruan; emakumeek, berriz, hamar. Gizonek bi buru omen dauzkate; emakumeek, berriz, bakarra. Datu hauek ikusita eta eragiketak eginda, kontuak ondo ateratzen dira: hamar hemeretziaren erdia da, gutxi gorabehera.

Honek guztiak behin andre batek esandakoa gogorarazi zidan. Bere ustez, gizonei berdin zaie “zuloa”, bertan sartu ahal badute eta, gainera, horrelaxe esan zien seme-alabei. Entzutean gogorra iruditu zitzaidan, baina aurreko datuok jakinda, andre hark bete-betean asmatu zuelakoan nago.

Badirudi honen azalpena genetikan dagoela, gizonek behar biologikoez pentsatzen dute, emakumeek baino gehiagotan sikiera. Ez dakit, agian hementxe egon daiteke emakume eta gizonen arteko desberdintasunik handiena, esan beharrik ez baitago emakumeek buru bakarra izanda ere neurona gehiago dituztela gizonek bi buruetan baino, ezta?

ROBINSON JAUNA

2011-12-02T23:52:00.005+01:00

Geure hitzen jabeak gara. Hitza hartu, eman, bete eta jaten dugu. Zuriz edo gorriz koloratu ahal ditugu. Alferrak, lizunak edo goxoak, jabeen modukoak. Une batzuetan onak edo gaiztoak besteetan eta, jakina, itsusiak, politak edo, politak baino politagoak, ederrak. Baina, hitz guztiak, guzti guztiak, garrantzitsuak bezain beharrezkoak. Hitz bat falta badugu, akabo! Asmatu behar.

Kataluniako unibertsitateko hizkuntza-zerbitzutik, baina sustatu.com-etik, heldu zaigu segidan ikus daitekeen bideoa. Katalanez dago, baina erraz ulertzen da. Ikusi nuenean galdera bat etorri zitzaidan burura: Zein da, zuen ustez, euskaraz ez dakien pertsona batek ezinbestean jakin behar duen hitza? Zergatik?

Euskararen eguna dela eta, bukatzeko bi hitz: HITZ EGIN

Oharra: sarrera hau ondo ulertzeko egin klik hemen eta idatzi “hitz”

BESOETAN HARTU ETA SEGI AURRERA

2011-12-02T23:44:00.005+01:00

Egindako inkesta baten arabera (BERRIA) euskarak oso presentzia eskasa du nerabeen sare sozialetan. Gazteek, nahiz eta euskara jakin, nahiago dute gaztelera besteekiko harremanetan eta euskara bakar bakarrik darabilte zorion mezuetarako.

Horretaz gain, euskara erabiltzen duten horietan oso euskara akademikoa erabili ohi dute, inolako freskotasunik gabekoa. Ez dakite euskara erregistro desberdinak erabiltzen eta beti erregistro berberera jotzen dute, egoera formaletan zein informaletan.

Hau ikusita eta euskaltegietako ikasleekin gauza bera gertatzen dela kontuan hartuta, EUSKERABILI egiten dugunoi “Besoetan hartu euskaldun-berria” kanpaina otu zaigu. Aita-ama pontekoek hartuko dute euskaldun-berrien ardura eta euskara hobetzen lagunduko diete, falta duten naturaltasuna izan dezaten. Bi aldeek agiri moduko zer edo zer sinatuko dute eta bertan bien betebeharrak zehaztuko dira.

Kanpaina hau, gure ustez, ikasleek duten kutsu akademikoa baztertzeko da eta garai batean euskara izan zena izateko, ahoz aho transmititzen zeneko euskara aberatsa eta bizia, alegia.

Zer deritzozue kanpaina honi? Zer proposatuko zenukete hain euskara akademikoa ez erabiltzeko?

ESAN DEZALA NAHI DUENA

2011-11-25T21:27:00.002+01:00

Bada, nahi duena esan ahal du lagunak. Neure burua ispiluan begiratzen dudan guztietan, ezin hobeto nago. Titiak erorita bai, baina nire urtebetetzerako oparitu didaten super-wordreba estreinatzen dudanean tente baino tenteago izango ditut. Alboz begiratuta perfektua, ez triparik ez mitxelinik. Ez da merkea izan, baina Alemanian erositako azken megafaxa jantzita goapo goapo nago. Begi-zulo batzuk, agian, baina orain erabiltzen dudan kremak oso ondo disimulatzen ditu. Gainera, begi ondoko zimurtxoak laster desagertuko dira, lagun batek etxeko laborategian prestatzen duen ukendu magikoa gauero bi astean emanda desagertuko dira. Bada, horixe, enteratuko da laguna geratzen garen hurrengo batean.

Garrantzirik ematen diozue besteek zuetaz pentsatzen dutenari?

Oharra: aurten inoiz baino ikasle politagoak ditugu, benetan, zer egiten duzue hain polit egoteko? Zer produktu edo trikimailu erabiltzen duzue?

ZERUAN BEZALA LURREAN ERE

2011-11-25T21:21:00.004+01:00

Ene Jainkoa! Bizitza osoan esan digute aingeruek ez daukatela sexurik eta gero hau! Orain ulertzen dut zergatik ezkutatu diguten egia urteetan. Hau elizaren beste sekretu bat izan daiteke, modan dauden eleberri sasi-historiako horietan agertzen direnen modukoa. Ez dakit sekta batek isilpean gorde nahi zuen ala soilik bakar batzuek jakin eta disfrutatu nahi zuten. Ez ziguten ezer esan nahi besteoi. Baina orain ezinezkoa da sekretua gordetzea, blog honetara ekarri ditugu probak: aingeruek sexua daukate.

Lasai egon zaitezte! Ez dizuegu aingerutxo hauei buruzko iritzia eskatuko, argi dago zen izan daitekeen; neuk, behintzat, argi daukat. Egungo publizitatean emakumearen papera zein den galdetu nahi dizuegu, zer uste duzuen eta zer deritzezuen bideoan ikusten den bezalako kanpainei.

GIZON HANDIA

2011-11-18T21:35:00.006+01:00

“El mole” txikia zen, jakina. Txikia eta argalegia garai hartako apaiza izateko. Zientziadun izengoitia zuen letrazko irakasle hau diktadura osteko apaiza modernoa zen. Sistema aldatu nahi zuen horietako bat zen. Sistema aldatu nahi zuen molekula txikienetik hasita.

Gurekin, ikasleokin, hitz egiten zuen eta, batez ere, entzun egiten zigun. Bizitzako gauza txikiei buruz hitz egiten genuen, baina mundua aldatu nahi genuen. Berarekin neskei buruz hitz egin genuen estreinako aldiz eskolako hormen barruan. Berarekin konprenitu genituen lehenengo aldiz helduen bizitzaren misterioak. Eta berarekin ikasi genuen hitz egiten.

Urte asko pasa izan dira eskola utzi nuenetik, baina oraindik estimatzen dut sotanarik gabeko apaiz txiki hura, “El mole”, benetan.

Zein irakasle estimatu duzue bereziki? Zergatik?

Nolakoa zen irakasle hura?

DENOK PATIORA!

2011-11-18T21:28:00.002+01:00

Oraindik ditugu gogoan txikitan kalean pasatako egun haiek, koadrila osoa kalean, pilotan, soka-dantzan, harrapaketan, … orduak eta orduak ematen genituen kaleko jolas haietan eta, egia esan behar badut, primeran pasatzen genuen.

Orain, berriz, gauzak aldatu egin dira. Umeak ezin dira kalean jolastu, ez baitago horretarako leku egokirik. Baina gu ez gara uste berekoak. Askotan, herrian zehar paseoan gabiltzala eskolako patioak, eskola ordutegietatik kanpo, hutsik ikusi ditugu eta, behin baino gehiagotan, elkarri galdera bera egin diogu: zergatik ez dituzte zabaltzen umeak bertan jolas daitezen?

Gure ustez, pena da horretarako aproposak izan daitezkeen lekuak arratsaldeetan itxita egotea, alegia, aproposeko leku horiek alferrik galtzea. Eta zuen ustez, zabalik egon beharko lukete eskolako patioek umeak jolasteko? Ordutegirik beharko litzateke?