80. EGUNA: IZPI ULTRA-BIOLETAK

Bigarren fasean gaudela oraindik gogo gutxi dut kalera ateratzeko. Aitortu behar dut zorioneko maskara jantzi beharrak atzera egiten didala egun askotan. Ohitura kontua izango da, segur aski, baina egun hauetan dugun eguraldia ikusita, sekulako zigorra deritzot maskara jartzeari. 

Hala ere, atera naizen apur horretan, bada harritu nauen zerbait: Ze beltzaran dauden batzuk! Ez dakit nola jarri ahal izan diren hain beltzaran, etxeko balkoietan edo leihoetan izan ez bada, jakina! Beraz, badira aldatzen ez diren gauzak, nahiz eta pandemian egon, ezta?

Egia da kolore apur bat izanik arropak hobeto ematen duela, baina eguzkia ordu luzez hartzea ezin da ona izan osasunerako, ez jauna! Askotan, uda heltzeaz batera, gogorarazten digute azala babestu egin behar dugula, gero arazorik ez izateko. Baina urtero ikusi ahal dugu ikatza baino beltzago dagoen jendea edo karramarro kolorea dutenak.

Hortaz, aurten ere pandemia eta guzti, jendea beltzaran ikusiko dugu kaletik, maskararen marka izan ezik, kar, kar, kar,…

Uste  duzue ona dela hain beltzaran jartzea? Zergatik jartzen da jendea beltzaran, besteen laudorioak entzuteko?

66. EGUNA: BESTE GARAI BATEAN…

Egun ederra gaurkoa. Eguzkitsua, oskarbi, egun argia. Beste garai batean, ez oso urrun, halako egun batek guztiok pozten gintuen, uda atarian geundela gogorarazten zigun eta. Baina aurten, zorioneko koronabirus honek, ilusio hau ere zapuztu egin digu, erro errotik.

Bigarren fasetik gertu egonda,  gauza gehiago egin ahal ditugun arren, ez da gauza bera. Beste garai batean halako eguraldia zegoenean, inolako ordutegirik bete gabe, hondartzara, mendira, kalera,… joan gintezkeen eguzkiaz gozatzera. Beste garai batean data hauetarako udarako planak egiten hasten ginen. Beste garai batean udako oporrak hartzeko irrikan geunden, urte osoko lanaren saria jasotzeko irrikan. Beste garai batean eguraldi honekin batera udako jaiak hasten ziren,  herri guztietako jaiak.

Beste garai batean halako gauzei ez genien garrantzirik ematen, berezkoak zirelakoan edo… a ze inozoak ginen!!!!  Gaur egun, honek guztiak Karinaren aspaldiko kanta gogorarazten dit, “ Buscando en el baúl de los recuerdos” izenekoa. Bertan edozein igarotako garaia hobea izan zela esaten zuen zatia, batez ere. Honen bihozkada izango ote zen?

Eguraldi onak alaitu egiten zaituzte orain bizi dugun egoeran? Baduzue kalera ateratzeko gogo handiagorik? Beste garai batean bazenuten ilusiorik uda atarian? Espero duzue hondartzara edo beste inora joatea udan? Nolako uda aurreikusten duzu?

EUSKALDUNOK EGUZKIARI BEGIRA INOIZ EZ

Adituen ustetan ez da posible berorik gabeko udarik egotea baina, orain arteko eguraldia ikusita, zalantza handiak ditut. Beste urte batzuetan garai hauetarako nazkatuta geunden beroaz eta egun freskoak eskertzen genituen. Aurten, berriz, honela jarraituz gero eguzkia luxuzko artikulua izango da eta ikusi nahi badugu beste edonora joan behar izango dugulakoan nago.

Hala ere, eguraldi txar honek ez digu umorea kendu, euskaldunok askorik ez badugu ere, eta dagoeneko asko dira horren gaineko txisteak, bideoak eta irudiak. Ez dakit umorez hartu behar dugun ala negar eragingo digun egoerak, baina eguraldiak horrela jarraituz gero bizilekua aldatzen pentsatzen hasi beharko dugu.

Zer deritzozue? Zer nahiago duzue eguraldi hau ala itzelezko beroa? Eta txisteez, zer uste duzue?