ZENBAKIEN JABEAK

Bi gehi bi berdin lau. Hori baino ez dakit matematikez. Oso txarra naiz zenbakietarako, ez naiz zenbakiak eta beraiek erabilita egin ahal diren beste gauzak ulertzeko gai.

Eskolan deskubritutako matematika mundu horretan galtzen nintzen guztiz. Ez nintzen ulertzeko kapaz zer zen limite bat infinitura doala. Infinitua, nola da posible hori kalkulatzea?  Bada, infinitua, infinitua … horixe da, horixe, … Zer demontre da infinitua? Eta limite bat hara doanean, nora demontre doa? …

Magikoa iruditzen zait mundu hori eta magoak zenbakiak erabiliz gauza harrigarriak egiten dituztenak. Sehaskatik datorren abilezia omen da. Batzuk zenbakietarako jaioak dira eta beste batzuk, berriz, hitzetarako. Mundua zenbakidun eta letradunen artean banatzen da eta segun eta non zauden gauza baterako edo besterako balio duzu.

Hala ere, eskolako eta institutuko urteak zenbakien artean eman nituen. Gero, unibertsitatean, bestera pasa izan nintzen, letren erresumara. Heziketa perfektua, zenbakiak eta letrak; edo heziketa inperfektua, ez zenbakirik ez letrarik. Batzuk ez gara jaio ez zenbakietarako ez hitzetarako.

Eskolan zertan moldatzen zineten hobeto? Zenbakiekin ala letrekin? Eta orain?

HAU EZ DA LEHENGOA

Garai batean maisu/maistrak medikuekin eta apaizekin batera herrietako On/Andreak ziren. Etxe propioa, herriko guztien mirespena baita herriko guztien era guztietako opariak ziren haiek zituzten pribilegioetako batzuk. Haien hitzak bazuen nolabaiteko ahalmena eskolan eta eskolatik kanpoko eremu askotan. Hartutako erabakiez ez zuten azalpenik eman behar eta ikasleek ez zuten inoiz arrazoirik ez eskolako arduradunen aurrean ezta gurasoen aurrean ere.

Gaur, ordea, errealitatea bestelakoa da. Irakasleek ez dute inolako ahalmenik ezer erabakitzeko. Zenbait eskolatan egin behar duten lana egin ahal izateko oztopo askori egin behar diete aurre, ikasleekin arazorik izanez gero ez dute norengana jo eta gehienetan, zoritxarrez, ikasleak berauek dira ahulezia honetaz gehien baliatzen direnak. Zenbat bideotan ikusi ahal izan ditugu ikasleak irakaslea jipoitzen legearen aurrean ez dutela erantzukizunik izango jakinda!

Zaila da esaten nola heldu garen egoera honetara, nola pasa garen mutur batetik bestera tartekorik izan gabe. Batzuen ustez, irakasleak garai bateko boterearen gehiegizko erabilera okerra ordaintzen ari dira, erabat azalpen sinestezina, nire ustez. Beste batzuen ustez, gaurko gurasoen permisibitatea da erruduna, guraso gehienek munduko seme-alabarik onenak dituztela uste baitute eta bakan batzuen ustez, ez dago azalpenik honetarako.

 

Zuek zeinekin zatozte bat?

OGI FALTA

Memeloa ala zintzoa? Ala biak? Ez dakit nolakoa naizen. Garai batean pertsona legal baten portaera izan nuela pentsatzen nuen baina orain, egunero telebistan ikusten duguna ikusita, ez dakit … Nire portaera inozo inozoa izan zela uste dut. Ziur aski ez duzue tutik ere ulertzen, baina gertatu zitzaidana irakurri ondoren ulertuko duzue primeran.

Euskara munduan hasi nintzenean umeekin eman nituen nire lehenengo klaseak. Hasiera horretan baneukan klasean 10 urteko ikasle formal formala, saiatua bera, baina euskararekin oso gaizki moldatzen zena. Gizajoak egiten zuen ahaleginaz konturatuta, ahal nuen guztietan laguntzen nion, baina bera ezin aurrera joan. 

Kurtsoa bukatzeko pare bat aste falta zirenean, bere ama etorri zitzaidan ikasleaz galdezka. Modu onean jakinarazi nion, nahiz eta oso langilea izan, kurtsoa errepikatu behar zuela, baina umeak egindako lanarekin pozik nengoela. 

Bileran amak nire arrazonamendua ulertzen zuela ematen zuen eta bera ere bazegoela ados nire erabakiarekin. Baina, hara non, elkarri agur esateko unea heldu zenean amak bere poltsatik pakete bat atera, nire mahai gainean utzi eta ziztu bizian alde egin zuen umeari ea nola lagundu ahal nion “galdetu” ostean.

Hor nengoen ni paketearekin zer egin jakin gabe. Ireki ala ez ireki. Azkenean ireki egin nuen. Barruan Salamancako txorizo sorta bat zegoen. Itxura ezin hobea, usaina gozo-gozoa, baina … Ezin nuen jan. Umeak gainditzeko “opari” bat zela iruditzen zitzaidan eta nik, pertsona legalen artean legalenak, ezin nuen onartu. Zer egin orduan? Eskarmentu handiko lankide batengana joan nintzen eta berak oso erraz konpondu zuen endredoa: ganibet bat atera eta txorizoak zatitu. Hor zeuden guztiek di-da batean jan zuten txorizo xorta. Ez nuen ezta zatitxo bat ere probatu. Ezin nuen. Lankide batek txorizoa goraipatu bitartean ogia falta zela esan zidan, barrezka.

Jakina, umeak ez zuen kurtsoa gainditu eta amak ikusi nuen hurrengo aldian bota zidan begirada ez dut inoiz ahaztuko.

Horrelako egoerarik izan duzue? Zer lortzeko pagatuko edo zenukete?

HIZKUNTZAK IKASTEKO ESKOLAK

IRAKURMENA:
NON DAGO ESKOLA-PORROTAREN GILTZA
Josu Sierraren iritzia irakurri.(IVAPeko 45. zbk., 22.orri.)
Gaia prestatzeko:
Zer dio idazleak?
Zein ideia nabarmenduko zenuke? Zergatik?
Eman zure iritzia:
Zer diozu gaiaz?
Edonork balio ahal du ikasteko?

HIZKA-MIZKA: ZEIN HIZKUNTZA ZEINEKIN?

• Gurasoek hizkuntza bana erabiltzeak nahasmena sor diezaioke umeari.
• Ez dago erabat frogaturik umeak txikitan bi edo hiru hizkuntza batera ikasteko gai direnik.
• Guraso bakoitzarekin hizkuntza ezberdina erabiltzeak gurasoenganako harremana baldintza dezake.
• Hainbeste hizkuntza jakiteak umearen ikas-prozesua motel dezake.

• Txikitatik ohitzen bada, une orotan zein hizkuntza erabili jakingo du umeak.
• Gauza jakina da ume txikien hizkuntzak ikasteko gaitasuna.
• Hizkuntza bat edo bestea erabiltzeak ez du gurasoenganako harremana baldintzatzen.
• Hobe izango du txikitan era naturalean ikastea, gero eskolan ikastea baino.

INKESTA ---- ERANTZUNAK

Inkesta: ZEIN SISTEMA NAHIAGO DUZUE?

PRESENTZIALA ……….. 5 (%30)

ON-LINE …………………. 4 (%23)

MISTOA ………………….. 8 (%47)