SOSLAI ONENA

Ile gutxiago eta sudurra luzeago. Horrelaxe ikusten dut neure burua oporretako argazkietan. Ez naiz batere fotogenikoa eta, sarri askotan, bertan agertzen dena neu naizela sinestarazi behar didate. Baina nik ezin sinetsi, ez naiz ni.

Ez daukat soslai onik. Leku guztietatik begiratuta, ez dut neure burua ezagutzen. Gorputzez ez nago txarto, aldean ditudan urteak jakinda; baina objektiboa banaiz, ez nago ibiltoki batean erakusteko. 

Ez naiz natural ateratzen argazkietan, baina aldizkarietan modeloak jartzen diren bezala jartzeari gorroto diot. Argazkiak egiten dituenak beti keinu arraro bat egiten harrapatzen nau, nire zain dagoela ematen du, nik aurpegi arraroena noiz ipiniko.

Ni baino askoz itsusiagoak diren beste batzuk primeran ateratzen dira argazkietan. Antza, haien kasuan, flashek bat-bateko edertasun tratamendu baten efektua dute haiengan. Aurrez aurre baino ederrago ateratzen dira. Ez diet inbidia. Oporretan haiek etengabe beren buruari argazkiak egiten dizkioten bitartean, nik bidean aurkitzen ditudan monumentuei. 

Fotogenikoak zarete? Nola ikusten duzue zeuen burua argazkietan? Gustuko duzue argazkietan zeuek ere agertzea? Argazkirik egiten duzue oporretan?

KLIK, FLASH, KLIK

Oporretara joateko maleta egitean jende askok sartzen omen du argazki kamara ezer baino lehen. Dirudienez, bisitatuko dugun leku horretako argazkiak izateak leku hori gozatzeak baino inportantzia handiagoa dauka.

Agian gogorra da horrela esatea, baina egin ditudan bidaiak egin ostean, eta zin dagizuet  batzuk izan direla, atera dudan ondorioa da. Opor-leku hautatu dugun horretara heldu orduko, behin aireportuko kontrolak pasata, hortxe daude bidaiari guztiak, argazki makina eskuan.

Berdin da zeri egin, zenbat egin edo nor agertuko den argazkietan. Inportanteena argazkiak ateratzea da, ahalik eta gehien, hobeto. Leku berbereko hamaika argazki izatea ez da arazo, beharbada lehenengo horretan atera ez dena besteetan deskubrituko dugu edo argazkia egin bitartean zer edo zer aldatu da lekuz. Batek daki zerk eginarazten dion jendeari horrenbeste argazki. Baina gaitz erdi orain dena dagoela digitalizatuta eta ez dela argazkiok gordetzeko horrenbeste leku behar, bestela arazoa litzateke etxean txokotxoa aurkitzea.

Konturatuko zaretenez, ez naiz argazkiak ateratzearen zalea eta are gutxiago bertan agertzearena. Onar dezaket baten bat egin beharra dagoela, leku horren oroitzapen modura, baina oporretako erreportajea egiteari denbora galtzea deritzot. Agian gustuko ez ditugun lagun horiek etxera bisitan etortzen direnetan jartzeko …

Zer iruditzen zaizkizue argazkiak etengabe ateratzen dituzten pertsonak? Beharrezkoa al da bisitatutako lekuetako argazkiak izatea? Argazki makina digitala asmakizun ona izan dela uste duzue?