GASTATU ETA GASTATU

Beste urte batez berriro Gabonen atarian eta beste urte batez kontsumitzera animatzen gaituzten hainbat iragarki non-nahi. Hedabide guztietan krisia hitza baino entzuten ez bada ere, berrien bitarteko iragarkiek bestelakoa adierazten digute.

Erosi azken IPONE berria, oparitu umeari telebista aurrean adurra dariola ikusten duen jostailutxo hori, hasi erabiltzen guztien artean berezien egingo zaituen lurrin hori … Iragarki bonbardaketa honek krisia dugula ere ahaztarazten digu eta mundua bukatzear balego bezala kontsumoarekiko harra asetzea besterik ez dugu buruan.

Halako jokaerek zer pentsatu ematen didate. Zerk garamatzan era horretan kontsumitzera, zer dela eta gauden orduak eta orduak amaierarik gabeko ilaretan, halakoetan diruari zer balio gutxi ematen diogun dira askotan neure buruari egiten dizkiodan galderak. Baina erantzunik aurkitzen ez dudanez neu ere gurpil zoro horretan naukate harrapatuta dagoeneko.

Kontsumismoa kritikatzen dugu eta gero kontsumistak gara, ala ez duzue hori uste?

DIRUAREN HOTSA

IRAKURMENA:
Xuhurrak eta gastatzaileak: Izaerak agintzen du, ez diruak

Gaia prestatzeko:
Zer dio idazleak?
Zein ideia nabarmenduko zenuke? Zergatik?
Eman zure iritzia:
Zer diozu gaiaz?
Diruak aldatzen du jendea?

HIZKA-MIZKA: BIZITZAN KONTSUMITU

• Oraingo gizartea kontsumista hutsa da, beti behar baino gehiago nahi du.
• Kontsumismoak azaleko pertsona bihurtzen gaitu.
• Ezer kontsumitu gabe ez dakigu bizitza gozatzen.
• Kontsumismoak handitu egiten ditu maila sozialen arteko ezberdintasunak.

• Betidanik izan da kontsumismoa, gauza berriak izatea beti izan baita gizakiaren gustukoa.
• Kontsumismoa da ekonomiaren oinarri nagusiena.
• Nork bere buruari gutiziaren bat ematea ez da kontsumista izatea.
• Kontsumismoak bizitasuna ematen dio hiri, herri edo herrialde bati.