AMETS BAT

Amets bat dut, bueno, amets asko ditut, baina ezagutzen nauzuenok badakizue amets bat dudala lanean. Ametsa polita bezain zaila. Agian horregatik da ametsa, betetzen zaila delako.

Hogeita hambi urte daramat lan honetan, hogeita hamabi urte amets berberarekin. Batzuetan hurbil izan dut, baina beste batzuetan urrun. Lortuko nuela pentsatzen nuenean, zapla!!!, desagertu egiten zen eta berriro beste urte bat zain.

Ez dakit erretiroa hartu aurretik lortuko dudan, horretarako ez zait asko falta eta. Baina ez dut amorerik emango eta aurten ere saiatuko naiz. Aurten ere nire ikasle guzti-guztiek gainditzea nahi dut, aurten ere espero dut ametsa betetzea.

Bestalde, bizitzan ere baditut ametsak.Txikiak eta handiak.Baina, bizitzan zoriontsua izatea da nire ametsa.

Eta zuek zer amets duzue? Zer dira ametsak zuentzat? Zein amets bete duzue?

60. EGUNA: BIZITZA AMETS BAT DA

Konfinamenduan gaudenetik egunero ohetik altxatzen naizenean neure buruari galdetzen diot hau guztia amets bat den, amets gaizto bat den. Oheratzen naizenean, berriz, beti espero dut hurrengo egunean esnatzean hau guztia pasatuta egotea. Baina, “marmotaren eguna” izango balitz bezala, hau guztia errepikatzen da, behin eta berriro errepikatzen da.

Normalean ez dut gogoratzen aurreko gauean amets egiten dudana. Adituek diote guztiok amets egiten dugula gauero, baina ni ez nago oso ziur, sarritan hain azkar pasatzen da gaua ezen ez bide dut astirik amets egiteko. Inoiz gogoratzen badut, bat-batean esnatzen naizenean, hau da, amets gaiztoa izan dudanean izaten da.

Itxialdiak ere lo egiteko modua aldatu dit. Ez dut lehen bezala lo egiten gauean esnatzen bainaiz pare bat aldiz eta, txarrena, ernagailuak jo baino hamar minutu lehenago esnatzen bainaiz. Birus madarikatu honek dena aldatu digu, oporrak, lan egiteko modua,… eta ametsak ere. Dagoeneko ez dugu ilusiorik, ez dugu itxaropenik eta, beharbada, ez dugu ametsik. Kaguen txos!!!

Ametsik egiten duzue? Zer-nolako ametsak dituzue? Badaukazue errepikatzen den ametsik? Kontatu ahal diguzue? Nola egiten duzue lo konfinamenduan gaudenetik?

ILARGIRAKO TXARTELAK

Asteleheneko gaua ilargira begira eman nuen. Gau osoa begira. Gaztetan bezala, balkoian manta bat gainean egiten zuen hotzetik babesteko, zigarro bat esku batean  eta bestean nire garagardo gustukoena. Begira eta begira.

Ilargi betea izan genuen. Oso hurbil. Hortxe zegoen bera, inoiz baino hurbilago eta inoiz baino beteago. Hurrengo ez dakit zenbat urtetan ez dugu berriro astelehenean bezala ikusiko, ez bezain betea, ez bezain zuria.

Ilargiak zer edo zer magikoa du eta ziur nago niregan, beste askorengan bezala, eragin handia duela. Ez zait gorputzean ilerik ateratzen, ez … baina bai, zerbait berezia nabaritzen dut ilargi betea dagoen egunetan.  

Astelehenean ilargian egon banintz bezala sentitu nintzen. Ilargian egon nintzen … horixe nahi dut, ilargian egon. Nire ametsetako bat da.  Egin nahi ditugun gauzen zerrendan lehenengo postuetan dut idatzita. Ilargira bidaiatu nahi dut. Duela ez asko Interneten bidez erreserbatu nuen lekua bidaia-agentzia batean Ilargira bidaiatzeko posible izango den egunean nire eserlekua izateko.

Zuengan badu eraginik ilargiak? Posible izango balitz, hurrengo oporrak Ilargian pasatuko zenituzkete? Zergatik?

HANDIA, KOLOREAK IGUAL DIO

Lagun baten ametsa beti izan da Bilbo erdian etxebizitza izatea. Eta, aurten  berrogei urteko muga pasata, lortu egin du. Horretarako Bilboko auzo batean ordainduta zeukan etxebizitza saldu eta berriro hil arterainoko zorpean, ametsa betetzeko. Sekulako lanak, merkatuan dauden azken nobedadeak, telebistan iragarki bat egiteko moduko sukaldea … Lagun guztiok eraman gaitu etxea ikustera, obretan eta obra bukatutakoan. Guztiok aho zabalik eta bera lerdea dariola. Dirua eta dirua!!!! Ez pentsa laguna diruduna denik, ezta hurrik eman ere! Gu bezain xumea da bera. Txalotzekoa da lagunaren erabakia. Etxebizitzaren maileguak ematen dituen burukominak ahaztuta zituenean berriro sartu da gurpil zoro horretan. Hori bai gogoa!

Ez dago, ez, ametsak bete egin behar direla ukatuko duen ama semerik. Baina bizitza baldintzatzeraino? Lagunak etxe makala du, ametsetako etxea, baina merezi du bizitza bideratuta duzunean lehengo buruhausteak berriro izatea? Nire ustez, ez. Oso argi daukat. Ametsak amets gozoak izan behar dira, ez amesgaiztoak. Gainera, honelako tentaziorik izan baino lehen beti dut gogoan aita zenak zioena: etxea norbera bizitzeko da, ez norbera etxearentzat.

Ametsak kosta ahala kosta bete behar dira? Etxea ordainduta izanik berriro zorpean biziko zinateke? Etxea erakusteko apaindu behar da ala eroso egoteko? Zer-nolako etxea duzue? Nolakoa izango litzateke ametsetako etxea?