EUSKAL EUROPA

Urte berri honetako lehenengo egunetik Europako Hiri Berdea izango da Gasteiz. Ez da hango patatengatik izan, ez. Sari honen bidez, Arabako hiriburuak ingurumenaren eta herritarren bizi-kalitatearen alde egindako lanari errekonozimendua eman diote Europa mailan. Bejondeizuela, gasteiztarrok!

2016an Kulturaren Europar Hiriburua Donostia izango dela jakin genuen aurreko urtearen hondarrean. Ez da pintxoengatik izan, ez. Kultura sortzen, sustatzen eta gozatzen inbertitutakoaren saria da hau. Bejondeizuela, donostiarrok!

Bi izendapen hauek nabarmentzen dute Autonomia Erkidegoaren indarra eta presentzia Europa zaharrean, baina … Bilbo? Zer izan daiteke hurrengo urteotan Europan? Zein hiri izan daiteke? Harrokeriaren hiria, txakolinaren hiria, … Bada, argi dago Europako hiriburua izango da, dudarik gabe. Eta zuen ustez, zein izan ahal da? Zergatik?

EGIN SLOWKI

Slow, low, fast … asko dira ingelesezko hitzez osaturiko izen mugimenduak, bai jauna, fast food, slow food, low cost … gero eta arruntagoak dira gure hizkeran. Baina bada bat, niri neuri sikiera, arrotza suertatzen zaidana, slow cities izenekoa. Izan ere, gurean bi ditugula (Mungia eta Lekeitio) irakurri izan ez banu, segur asko ez nintzatekeen enteratuko.
Antza, asko dira izen hau izan nahi duten udalerriak, baina horretarako baldintza batzuk bete behar dira: 50.000 biztanle baino gutxiago edukitzea, hiriburua ez izatea eta ingurumenarekiko begirunea izatea. Slow cities estresik gabeko bizi-kalitatea aldarrikatzen dute, tradizioari eusten diote aurrerapen teknologikoak alboratu gabe, energia berriztagarriak sustatzen dituzte, ingurumena kaltetzen dituzten lurrin isurketak murrizten dituzte …

Ez dakit, horrela esanda polita ematen du, bina Mungian bizi naizen honek, egia esan behar baldin badut, ez dut uste hango jendeak estresik ez duenik, ez beste leku batzuetakoak baino gutxiago behintzat. Agian bizilekuak baino lanlekuak izan beharko luke slow izena, ez duzue horrela uste?

ENE, NOLA ALDATU GAREN!

Adin bat daukagunok ondo baino hobeto gogoratzen dugu nolakoa zen gure herria eta nola aldatu den. Oraingo herri txukunak ez du zerikusirik lehen zenarekin. Gauza asko, agian, ez zaizkigu batere gustatuko, baina ezin da ukatu aldaketa, oro har, onerako izan dela. Bestela ikusi Klikvision taldeak egindako time-lapsea eta flipatu.

Nola aldatu da herria? Nolakoa zen?
Zer gogoratzen duzue?
Zein izan da aldaketarik inportanteena?
Zein da gehien gustatzen zaizun herriko gauza?

Oharra: “Barakaldo Taupada”-k BBK-k antolatutako time-lapse lehiaketan aurkeztutako proiektua da. Lehiaketa honetan internautek aukeratuko dute irabazlea.

HIRI ARTEKO ZUBIAK

Oraindik dut gogoan zer-nolako istilua egon zen Calatravak diseinatutako zubia aldatu zutenean.Ez dakit gogoratuko zareten honetaz, baina ni zur eta lur geratu nintzen Calatravra honek epaitegira joko zuela esan zuenean bere obra baimenik gabe aldatzearren. Epaitegira jo ez ezik irabazi ere egin zuen, eta ez dirutza makala.

Guztion ahotan zebilen Calatravaren zubi hura, eta egia esan behar badut, bertatik pasatzen naizen bakoitzean ez diot inolako xarmarik ikusten, adituen ustez “artea” bada ere. Are gehiago, ez dut oso ondo ulertzen hiri gehienetan edo behintzat batzuetan Calatrava, Isozaki, Gehry edo Fosterrek proiektatutako eraikuntzak egotearen oraingo moda hori. Egingo ote dio horrek mesederik Bilbo bezalako hiri bati? Bagara gai “arte obra” horiek baloratu ahal izateko? Baietz pentsatu nahiko nuke, halakoetan hainbeste diru gastatu ondoren, eta epaiketakoa ahaztuta, jakina.