ERABAKI AZKARRAK ZALANTZAZKO ERABAKIAK

Duela gutxi entzun nuen Victoria Beckhami damu egin zaiola titiak operatu izana. Urteetan ukatzen ari izan den operazioaz damu izan da gure Spice Girl famatuena.  Agian, hemendik aurrera famatu guztiak hasiko zaizkigu egindakoaz damutzen, orain arte behin eta berriz ukatu dutenaz damutzen. Une jakin batean hartu zuten erabakiaz damutzen.

Txikitatik hartu behar ditugu erabakiak. Hala behartu eta behartzen gaitu bizitzak eta askotan gure inguruan dauden pertsonek eta egoerek ere. Egunero hartu behar ditugu erabakiak, ohetik jaiki bezain laster: zer egin lehenago, dutxatu ala gosaldu? Alkandora ala nikia? Soinekoa ala prakak? Zer prestatu bazkaltzeko? Ala etxetik kanpo bazkaldu?

Bizitza osoa da erabakia eta beti asmatzen ez dugun arren, erabakitzen jarraitu behar dugu. Batzuen arabera, hartzen ditugun erabakiek markatzen digute bidea, nork bere bidea erabakiz osatzen du. Agian arrazoia dute, baina hala ez bada, beti geratuko zaigu damutzeko aukera.

Zenbait aldiz damu izan zarete egindakoaz? Erraza da erabakiak hartzea? Eta zein izan da hartu duzuen erabakirik onena?

OH KAPITAINA, NIRE KAPITAINA!

Kaskoan sartu eta egin beharra dut. Ume txikiek bezala egiten dut, nahi dudana lortu arte hortxe nabil matraka ematen. Ez dut amorerik ematen, ez, ezta pentsatu ere!

Horrelakoxeak izan behar dira aste honetan  Yosemite parkeko Kapitaina mendia igo dutenak, sokarik gabe, baina bi potrorekin, eta alderdirik zailenetik, gainera. Granitozko 910 metroko horma bat da Yosemite, munduko handiena eta zailena. 19 egun eman dituzte monolitotik zintzilikatuta, egunez eta gauez, jaten eta lo egiten, egin behar den guztia egiten.

Txapela kentzeko modukoa izan da. Beti desio dugun gauza zail bat lortzen dugunean txapela kentzeko modukoa da. Yosemite bakarra dago munduan, baina Yosemite asko daude gure bizitzan eta askotan bakarrik bi potrorekin egin behar diegu aurre. Horrelakoetan poztasuna handiagoa da.

Zer Yosemite igo duzue? Eta igo nahi duzue? Zer nolako poztasuna eman zizuen?

ZIRT EDO ZART

Arre edo so. Bizitzan  batzuetan trantze batean gaude eta ez dugu beste erremediorik, aukeratu beharra dugu. Ez da erraza izaten, baina …

Gaizki edo ondo, baina erabaki askotxo hartu ditut nire bizitzan. Gaizki hartuak ahaztuta edo ahaztu nahi eta ondo hartuak gogoan. Ondo hartuen artean badut bat, ez dakit zergatik, egun hauetan buruan bueltaka eta bueltaka.

 

Eskolan nengoela, kurtsoaren hasieran apaiz zahar batek galdetzen zigun zer izan nahi genuen heldutan. Hamar urteko ume batentzat galdera zaila, baina erantzun errazekoa: futbolaria, abokatua, … Neuretzat ere erraza: apaiza. Papertxoan apaiza eta izena idatzita, banekien Franco garaian askoz errazagoa izango zela kurtsoa gainditzea, batez ere, apaizen eskola batean. Horrela ibili nintzen urte osoan erlijioak ematen zituen pribilegioez disfrutatzen ekaina heldu arte, erabakia hartzeko unea heldu arte. Bakarrik gurasoen baimena falta zen eta seminariora. Hor nengoen zer egin jakin gabe. Egia esan eta etxean geratu ala fartsarekin jarraitu eta Jainkoarentzat lanera.

Ni bezalako deabru batentzat hartu nuen erabakia onena izan zen.

Zein izan da zuek hartutako erabaki onena? Zergatik? Nola hartzen dituzue erabakiak? Zaila da

PATUA BERRIDAZTEN

Ba ote dago paturik? Zenbat bider galdetu ote diodan hau neure buruari, batez ere, zoritxarrak gertatzen direnean.

Gizajoa! Patua zuen hori! Patuaren kontra ez dago borrokatzerik! Askotan entzun eta esan ditugu halakoak, baina benetan patua da ala hori gertatu baino lehen hartutako erabakiaren ondorioa?

Asko dira gizakiok bizitzan zehar hartu beharreko erabakiak. Asko dira zirt edo zart egin beharreko egoerak eta bata edo bestea hautatzeak ondorio ezberdinak dauzka. Batzuetan ondorio onak, baina besteetan ez hain onak. Jakina! Hain onak ez diren horietan zorioneko patua dugu aitzakia.

Zoritxarraren aurrean gizakiok azalpena bilatu nahian edozer sinesten dugu, gure errua izan ahal izan dela sinetsi baino lehen. Agian ez garela gure etorkizunaren jabe, gure erabakiek ez dutela gure etorkizuna baldintzatuko sinestea komeni zaigu. Egiten duguna egiten dugula, ondorioak berberak izango direla, alegia, zorioneko patuak egingo digu bidea!

Ba al dago paturik?