Ederra da elurra. Paisai politak uzten dizkigute elurteek. Dena zuri, zuri-zuria. Ederra da elurra eta ederra da transmititzen digun berotasuna. Hotza denak beroa transmititzen digu, sutondoko beroa.
Urteek, ez elurteek, zuritutako ileak ditugunok ziur aski
gogoan izango ditugu beste garai batean izandako elurte haiek. Neuk, behintzat,
gogoan dut unibertsitatean nengoela bizi izandako elurtea. Azterketa garaia zen
eta azterketan zuri geratzeko beldurrez lehenengo elur-malutak noiz eroriko
zain zerura begira, ez liburuetara, eman nuen gaua. Handia izan zen elurte
hura. Azterketak bertan bera utzi eta aste beteko oporraldia eman ziguten.
Lagunak bildu, ondoko mendien magaletara igo eta gero plastikoz inprobisatutako
trineo batean ziztuan jaisten ginen
berriro igotzeko.
Urte hartako aste hartan kaosa izan zen nagusi herrian.
Arazoak izan genituen ohiko gauzak egiteko, erosketak egiteko, leku batetik
bestera joateko, autoak gidatzeko, … kaos totala. Hauxe da zuria denaren alde
beltza.
Nola bizi izan duzue elurte hau? Gogoratzen duzue izandako
elurteren bat? Zer uste duzue elurteek eragindako kalteez? Eta elurraz, oro
har?
