TRUKU ALA TRUKE?

Krisian gaude, krisi sakon batean. Krisi honek dena kolokan jarri du eta disfrutatzen ari ginen ongizatezko gizarteari amaiera eman diogu. Goian bego!

Garai berri baten aurrean gaude zer etorriko zain, izututa. Mundu osoan antzera gaude, baina badirudi Europa zaharberritu honek kolperik handiena jaso duela eta batzen gintuen bakarra, hau da, Euroa ere kolokan jarri duela ditxosozko krisiak.

Pezetara bueltatuko garela diote aditu batzuek. Baina ezkorragoa naiz eta    trukaketara bueltatuko garela pentsatzen dut. Gure lanaren truke ez digute xemaikorik emango. Ez digute dirutan ordainduko, lanaren truke besteen lanen fruituak izango ditugu, aitzinean bezala.

Egoera horretara heltzen bagara, argi eta garbi daukat: txokolatearen truke, jateko txokolatearen truke lan egingo dut. Eta zuek? Zeren truke zaudete lan egiteko prest? Inoiz lan egin duzue dirurik kobratu gabe? Non? Zertan?
 

KRISIAREN ONDORENGOAK

Aurreko sarreran esan bezala, ezin ukatu krisian gaudela. Egunez eguneko hedabideetako datuak gero eta kezkagarriagoak dira, eta bertan agertzen zaizkigun kasuak, benetan, hunkigarriak ere badira. Familia asko miseria gorrian, jende asko langabezian, gazteak eta ez hain gazteak gurasoen etxera bueltatu beharra …. 

 

 

Hamaika zoritxar utzi dizkigu krisi honek eta oraindik ez du ematen bukatuko denik, gogorrena falta dugula ere esango nuke. Hau dela eta, udan sindikatu hark egindako protesta datorkit burura: supermerkatuan sartu eta erosketarako orga bete, aberatsen etxeetan sartu eta igerilekuaz gozatu barbakoa egin bitartean …  Zer gertatuko litzateke zer jan ez dutenek halakorik egingo balute? Eta aterperik ez dutenak hutsik dauden etxe polit eta erraldoi horietan sartuko balira? Ez ditut  azken hauek justifikatu nahi baina, udan gertatutakoak batzuen oniritzia izan bazuen, nola zigortu orain beharrak eraginda gertatzen bada? Zer deritzozue sindikatu hark egindakoari?

INKESTA ---- ERANTZUNAK

Inkesta: Krisialditik ateratzeko banku bat lapurtuko zenuke, plan on bat edukiko bazenu?

Beti gure ikasleak zintzoak direla esaten dugu, beno bi edo kenduta, eta inkestan argi geratu da. Hala ere, lapur bati lapurtzen diona...

BAI……......…. 2 (%12)

EZ…………....... 17 (%88)

HAU DA HAU BIZIMODUA!!!

Une honetan ez dago ezbairik: MUNDUA KRISIAN DAGO!!! Azkenean mundu globalizatu honetan ditxosozko krisialdia sumatu dugu gure patriketan.

Momentu txar hauetan ikusten da, inoiz baino hobeto, gizakiok daukagun irudimena arazoei aurre egiteko eta, ondorioz, asko dira leku guztietatik ematen dizkiguten aholkuak eta erabiltzen hasi garen trikimailuak krisiaren kalteak ekiditeko.

Duela gutxi, Galizian bizi den emakume baten kasuak harritu gintuen. Emakumea supermerkatura joaten zen eta bertan produktuen prezioak aldatzen bide zituen: supermerkatukoa kendu eta berak etxean egindakoa ipintzen zuen. Emakumeak, inolako lotsarik gabe, edozeri aldatzen zion prezioa eta ondo gainera! (begira bestela argazkia. Mila eta piko euro balio zuen telebista 12 eurotan utzi zuen).

Ez dago esan beharrik berehala harrapatu zutela, baina emakumearen adibideari jarraituz zuei bururatzen zaizkizuen trikimailuak zerrendatzea proposatzen dizuegu komentariotan.

ZURTZ INTTE

Lehen aipatu bezala, krisialdia bazter guztietara heldu da eta hedabide guztietan zur eta lur uzten gaituzten berriak aurki ditzakegu. Segidan dituzuen berriak lagin bat baino ez dira, baina aski dira arazo berri honen tamainaz jabetu ahal izateko.

· Ezkonberriek bereak eta bi egin behar dituzte aurrekontuan ezkontzako gastu guztiak sartzeko: gonbidatu gutxiago, menua askoz merkeagoa, eskuz egindako gonbidapenak, argazkiak CD formatuan, eurek grabatutako musika erabili, …
· Dibortzioek behera egin dute izugarri azken hilabeteotan
· Azken bolada honetan Balentzian apaizgaien kopurua bikoiztu egin da
· Espainiako soldadua izateko aurrez izena ematearen kopurua handitu egin da
· Krisia dela eta, hurrengo urteotan delinkuentziak gora egingo duela aurreikusten da
· Lantokietan bajak eta lanera ez agertzea murriztu egin dira nabari

KRISIA, ZER DA HORI?

IRAKURMENA:

Urre gorriaren garestitzeak zerbait esan nahi ote du?

Ia herritarren oharkabean, urrearen salerosketak inoiz baino beroago daude. Aditu batzuek metal horrek laster prezioa gori-gori izango duela diote. Urrearen prezioa zikloka mugitu izan da, ekonomia bera bezala. XXI. mendean ere, aberatsek urre zaharra nahi dute eskuetan, badaezpada.

HIZKA-MIZKA

ORAIN LEHEN BAINO …

- Ongizate garaian murgilduta gaude eta hobeto bizi gara erosotasun guztiak baititugu
- Ahaleginaren ahaleginez lortu ahal dugu edozein gauza gizarte honetan
- Bizitzaz gozatu ondoren eraikitzen dugu familia
- Teknologiak bizitza errazten digu

- Zoriontsuagoak ginen gutxiago bagenuen ere
- Egun gizarte-harremanak azalekoak dira; lehen, berriz, askoz sakonagoak ziren
- Gauzak lortzeko ez zuen edozerk balio, etikak eta gizalegeak agintzen zuten
- Familia osatzea zen helburu inportanteenetariko bat
- Ez ginen teknologiaren morroiak eta ez genituen bere ondorio txarrak pairatzen

MONEY, MONEY,MONEY... A2

1A MAILA

Egun ezin da KRISI hitza erabili. Espainiako gobernuak bere ordez atzeraldi ekonomikoa, dezelerazioa, prozesu baten amaiera, eta horrelako definizioak erabiltzen ditu jasaten ari garen egoerari izena emateko. Europako Banku Zentralak, aro berri honi aurre egiteko, INFLAZIOA murriztea ezinbestekotzat jotzen du. Badirudi dirua (kobratu orduko) alde egiten zaigula eskuetatik eta ez garela ezer aurrezteko kapaz izaten.

Gauzak horrela, blog honetan alde egite hori saihesteko diru pixka bat aurrezteko bururatzen zaizkigun neurri orijinalak zerrendatu nahi ditugu beheko komentarioetan.

Adibidez, argazkietan ikusi ahal duzuen bezala, billeteetan pertsona famatu batzuen aurpegiak ipini ditugu jendeak bilduma egin eta horrela alferrik ez gastatzearren.