TXARRAGO EZINEZKOA

Bat, bi eta hiru … ondo itxi dut, ez, ez, ez. Bat, bi eta hiru, orain bai,... ez, ez, ez nago ziur, konprobatu egin behar dut. Bat, bi eta hiru, orain bai, ez daukat inolako dudarik, ala ez? baietz, ondo itxi dut, kontxo!!!

Ez daukat mania askorik, baina honelako batzuek guztiz harrapatuta naukate eta, aitortu behar dut, holakoetan ez naiz ni. Ez da normala atea itxita dagoenean behin eta berriro begiratu behar izatea, ez da normala Laponiatik ekarri nuen lorontzia mahai gainean iparraldera begira egon behar izatea, ez da normala lanera bide beretik beti joan behar izatea. Ez da normala eta badakit; baina egin beharra dut, bestela estu eta artega nago.

Gainera, urteekin gero eta mania gehiago dauzkat. Horrela jarraituz gero, maniak baino ez ditut egingo. Prisoi honetatik alde egiten saiatu naiz, baina ezin izan dut agoantatu. Mania horiek egin behar ditut, bai ala bai.

Eta zuek, baduzue maniarik? Zeintzuk? Zergatik?

URTEAK AURRERA JOANDA

Amak askotan esaten du gaztetan zaila egiten zitzaiola adinekoek zioten zenbait gauza sinetsi ahal izatea, esate baterako, lo egiteko arazoak izateari sinestezina zeritzon. Bere ustez, nekaturik egonez gero edonon egin zitekeen lo. Orain, urteak aurrera joanda, onartu beharra izan du garai haietan hainbeste sinestea kostatzen zitzaion hura benetan horrela dela. Orain, laurogei urteen ostean, berak ere sufritu izan du lo egin ezina eta dagoeneko aurkitu dio zioa: adina, zahartzaroa.

Adina omen da pertsonon portaerak aldarazten dizkiguna. Maniak, ziurtasun eza, beldurrak … urteekin agertzen omen dira eta, hauetatik inor ez dago libre, gazte garenean kontrakoa uste badugu ere. Gaztetan beldurtzen ez gaituzten gauzek, egunerokotasunek … zahartzaroan izutu egiten gaituzte, inoiz egin izan ez bagenitu bezala. Kalera ateratzea, etxeko lanak edo mandatuak egitea adin batetik aurrera kontra egin beharreko etsaiak dira, eguneroko bizitza zailtzen diguten etsaiak.

Ez duzue berdin pentsatzen?