Gauza batzuetarako ez naiz oso trebea. Ezagutzen nauzuenok badakizue
izenetarako eta zenbakietarako ez naizela batere abila, trakets samarra baizik.
Baina, bueno, tira guztiok ditugu gure gauzak.
Lagun askok arazo handiak dituzte teknologiarekin, beste batzuek
etxetresnekin eta gehienok, nik barne, zenbait fakturarekin. Ez dakit
konpainiek zer nahi duten, baina gero eta zailagoa da beren fakturak ulertzea.
Azkenean gutxi gorabehera hilero ordaintzen dugunarekin bat badator, ez dugu pegarik
jartzen eta fakturak gordetzen ditugun karpetan sartzen ditugu eta kitto!!!
Baina badira komeriak ohikoa baino gehiago ordaindu behar dugunean.
Faktura horien artean ulertzen zaila baino zailagoa dena Euskaltelena
da. Pasa den astean nire kontuak ez ziren ateratzen, faktura hartu eta ez nuen
piperrik ere ulertzen. Ez duzue sinetsiko, baina alderantziz ari nintzela
irakurtzen pentsatzeraino heldu nintzen. Ez nuen deus ere ulertzen. Master bat
egin behar da ulertzeko. Azkenean, errazena egin nuen, telefonoz deitu nuen eta
konpondu egin nuen. Dena den, telefonoaren beste aldean zegoenak emandako
azalpenak entzunda ere, ez nuen fakturan ezer ulertzen. Beraz, inon bizitzarako
master hori martxan jarriko balute, dudarik gabe, izena emango nuke.
Zer da zuentzat ulertzen zaila baino zailagoa? Zer egiteko
duzue zailtasun handia? Zergatik? Baduzue honen inguruan kontatzeko
pasadizorik? Zein?
