ZUK ZEUK EGIN

Beti esaten da pieza guztiak bere lekuan jarrita ere torlojuren bat sobera dagoela. Ez dakit beti egia den. Nik bakarrik armairu bat muntatu nuen eta, egia esanda, bat baino gehiago izan ziren soberan geratu ziren torlojuak …, bueno, torlojuak eta beste gauza batzuetarako balio zuten hainbat gauza.

Txikitatik gustuko izan dut maketak egitea eta etxea horrelako trastez josita dut. Erdi-aroko katedralak, zazpi itsasoak zeharkatu dituzten itsasontziak edo Txinako pagodak daude etxeko bazter guzietan. Nire museo txikia. Nik egindako obrez osatutako museoa.

Gauza txikiekin ondo moldatzen naiz, baina pieza handiak direnean zail egiten zait dena behar den moduan jartzea eta perfektu uztea. Suediako enpresa horretan erositako armairua da lekukoa. Ez dut ondo gogoratzen orain dela zenbat urte erosi nuen, baina ondo dakit hasiera-hasieratik tiradera bat ezin nuela itxi eta horrela egon da gaur arte eta horrela egongo da armairu aldatuko dudan arte.

Horrelako esperientziarik izan duzue? Zein? Trebeak zarete horretarako? Zer uste duzue Suediako enpresaz?

ONGIA, EDOZEIN ORDUTAN ETA ERLOJUTAN ONDO ETORRIA

Gustuko ditut erlojuak, baina ez dut uste inoiz bat erosteko dirutza ordainduko nukeenik. Egia esan, ez dakit zerk egiten duen erloju batek 3.000 eurotik gora balio izatea, beno, kopuru bat jartzearren zeren merkeagoa izateari ere gehiegikeria baiteritzot.

Badakit jende asko ez dela iritzi berekoa eta bi aldiz pentsatu gabe ordainduko lukeela diru hori, diru arazorik izango ez balu, jakina.  Zer-nolako aurpegia jartzen zaien bitxitegietako erakusleihoetan dauden erlojuei begira ikustea besterik ez dago. Aho zabalik, lerdea dariela, nola emango lieketen erloju horiek beren eskumuturrean irudikatuz orduak eman litzakete erakusleihoaren aurrean.

Iritzi hau dutenei askotan galdetu diet horren zergatia, baina esandako erantzunek oraindik ez naute konbentzitu, ezta iritzia aldarazi ere. Momentuz, nahiago dut askoz merkeagoak diren erlojuak erosi, eguneko bat jantzi, izorratzen direnean bota eta ez galtzearen edo lapurtzearen beldur izan.

Aberats jaio izan banintz 3.000 euroko erlojuak 20 eurokoak besteko balio izango luke eta diru hori huskeria litzateke, baina, zoritxarrez, kasu hori ez denez jarraituko dut erloju merkeak erosten eta ahal bada 20 eurotik beherakoak. Bestela, erloju garesti horien kopiak zenbatean daude? 

Gastatuko zenukete hainbeste diru erloju batean?

HORTERAK NONAHI

Galtzerdi zuri-zuriak eta zapata beltzak daramatzana da hortera. Txandala arrosa eta takodun zapatak janzten dituena da hortera. Bi kiloko urrezko eskumuturra edo urrezko eraztuntzarra daramana ere bada hortera. Hortera asko daude munduan eta Euskal Herrian ere egon badaude, jakina.

Baina, hortera ez da bakarrik arropa bat edo bestea janzten duena. Hortera autoa “tuneatzen” duena izan daiteke edo musika mota bat entzuten duena.

Guztiok daukagu lagun hortera koadrilan. Nirean, adibidez, arropetan diru asko gastatu arren koloreak ondo lotzen ez dakien bat dugu. Ez dakit daltonikoa den ala etxean ispilurik ez duen.

ZER DA HORTERA IZATEA ZUEN USTEZ?
BADUZUE HORTERA DEN LAGUNIK? NOLAKOA DA?

ARROPA MARKATUZ

Duela gutxi The Guardian egunkariko irakurle batek galdetu zuen bertan pertsona askok zergatik egiten dieten publizitatea arropa-markaren izenei bere arropetan. Egunkari horretako kazetari baten erantzuna hauxe izan zen: ergel hutsak direlako.

Armairuko arropa ikusita, kazetariak arrazoirik ez duela pentsatu nahiago dut, baina egia da erantzuna bitxia dela. Ez dakit memelo hutsak garen, baina erdi-tontolapikoak bai. Arropa erosi, marka jakin baten truke dirutza ordaindu eta, gainera, gure gorputzaren leku estrategiko batean eramango dugu bere izena. Publizitate ezin hobea, baina xentimorik ikusi barik.

ZER DERITZOZUE KAZETARIAK EMANDAKO ERANTZUNARI?

ZER DELA ETA JANZTEN DITUGU HONELAKO ARROPAK?

TXIMINOA BETI TXIMINO

IRAKURMENA:
Gero eta neurri txikiagoko arropa saltzen dute dendek, argaldu behar al dugu?

Gai honen inguruko Ainara Bedmar-ren iritzia irakurriko duzue. IVAP-eko aldizkaria, 53.zbk., 19.orri.

Gaia prestatzeko:
Zer dio idazleak?
Zein ideia nabarmenduko zenuke? Zergatik?
Eman zure iritzia:
Zer diozu gaiaz?
Zein ardura daukate dendek auzi honetan?

HIZKA-MIZKA: MARKAKO ARROPA

Markako arropa erosteko dirua izan behar da.

Kalitate hobea dute.

Diseinua politagoa da.

Markako arropek maila sozial altuagoa adierazten dute.

Egun pirateriak markako arropa prezio merkeagoan erosteko aukera ematen du.

Markako arropa ez da kalitate hobea, marka ordaintzen da.

Gizarte maila altua izan ahal da, baina markako arroparik gabe.

Une honetan arropa sarritan aldatzea da inportanteena eta ez kalitatezko produktuak izatea.