24. EGUNA: AZALPENIK EZ

Txinatarrak, amerikarrak edo errusiarrak, guztiak susmagarriak. Animaliak ere errudunak: saguzarrak, pangolinak eta txerriak. Laborategi batean apropos sortutakoa edo bertan egondako isuria, soldadu batzuek eraman zuten gaixotasuna eta, zergatik ez, guda kimikoa. Dena gezurra ala dena egia? Hamaika teoria daude, hamaika konspirazio; baina egia, beti bezala, bakarra. Eta ez dakit inoiz jakingo dugun.

Ez naiz oso konspirazioen aldekoa eta uste dut gauzak gertatzen direla gertatzen direlako. Ez da beharrezkoa atzean esku beltza egotea, gauzen zioa azaltzeko. Azalpenak normalean sinpleagoak izaten dira eta ez daukate alde ilunik.

Konspiranoikoz inguratuta bizi gara eta gaur egun disfrutatzen egongo dira zurrumurruak, erdi usteak eta konspirazioak lau hauzetara zabaltzen. Jendearen beldurraz baliatzen dira beldur gehiago hedatzeko eta ez dute inolako erreparorik edozein astakeria esateko. Baina, agian, horietako baten bat egia izango da birus kabroi horren jatorria azaltzeko.

Zein uste duzue egia dela? Konspirazioen aldekoak zarete? Zergatik?

NAGUSI APARTA

Agintzea erraza da. Agintzeko ez da ezer berezirik eduki behar. Edonork agintzen du herri honetan. Edonori ematen diote aukera agintzeko. Fabrika batean, eskola batean, denda batean eta, zergatik ez, euskaltegi batean edonor izendatu ahal dute zuzendari eta  hogeita hamahirugarren artikuluagatik egingo dugu bere menpe gaudenok berak esandakoa.

Agintzea erraza da, baina ondo agintzea zaila izan behar da. Boterea erabiltze horrek  duen ustezko erotikaren atzaparretan ez erortzea zaila da. Ez dakit, nik ez dut agintzen, ezta nire etxean ere. Demokrazian jaio ez ginenok engainatuta bizi izan gara eta erabakiak denon artean hartu behar direla sinesten dugu. Demokrazia sistemarik onena delako pentsamenduarekin hazi  ginenok  ez dugu inoiz inon inor agintzen. Aginteak jasotzeko jaioak gara.

Agintzea erreza da eta zuzendari guztiek egiten dute. Zaila, benetan, zaila dena da langileei ondo egindakoak txalotzea eta eskertzea. Hemengo nagusiek hau eta hau egin behar duzula esateko ez dute problemarik, baina eskerrik asko egin duzunagatik edo lan bikaina egin duzula esatea kosta egiten zaie. Bueno, ez, ez dute inoiz esaten.

Honetan ere txinatarrak onenak. Hango lan-baldintzak haientzat, baina enpresa batzuetan langileak motibatzeko erabiltzen dituzten teknikak guretzat nahi ditut. Begira bestela enpresari txinatar batek enpresaren hogeigarren urteurrena ospatzeko egin duena: 6.400 langile eraman ditu Txinatik Parisera eta Nizara. Hori bai dela eskertzea urte horietan egindako lana eta ez hemen egiten dena. Euskaltegiko hogeita bosgarren urteurrenerako boligrafodun karpeta bana eman ziguten egindakoa eskertzeko. Espero dut hemengoek hurrengo urteurrena ospatzeko txinatarrek asmatutakoa egitea.

Erreza da agintzea? Zer behar da ondo agintzeko? Nolako nagusiak (izan) dituzue? Zer iruditzen zaizue enpresari txinatar horrek egindakoa?