2022/01/14

PRIMERAN!!!

“Oso ondo hitz egiten duzu eta nahiko ondo idazten duzu. Euskaltegi gehienetan ez dago zu bezalako ikaslerik. Baduzu zerbait berezia,… Ez dakit zer den, baina ikasle gutxik dute zuk duzun komunikatzeko gaitasuna. Euskaldun peto-petoa zara, txo. Baina,…, pena handia ematen dit,… Azterketa honetarako ez duzu behar besteko maila. Sentitzen dut, benetan! Oso ona zara, baina… EZ GAI zara. Segi lanean eta ziur nago hurrengoan lortuko duzula. Txalo bero bat ikasle honentzat,…”.

Halakorik entzuten dudanean, ez dut ezer ulertzen. Pertsona bat ona bada,… edozein gauza egiten, ez bakarrik euskaraz, ez dut ulertzen. Hori da talentu berriak bilatzeko programetan gertatzen dena. Coachek lasai asko esaten dituzte holakoak, baina gero ez dute pertsona hori aukeratzen, edo ez dira eserlekutik mugitzen edo ez dute eserlekua mugitzen. Egia gogorra bada ere, hobe da egia, nire ustez.

Txarrena da hori entzuten duten pertsonek, gainera, eskerrak ematen dizkietela. Horixe bakarrik behar zuten!!! Kaleratu eta eskerrak eman. Eskerrak beti geratuko zaigula Risto!!!

Zer nahiago duzue? Egia gordina ala, bueno, gauza onak entzun? Zer uste duzue talentu berriak bilatzeko programa horietaz? Zer deritzezue coachei? Zein da zuen talentua? Abestea? Margotzea?... Parte hartuko zenukete horrelako programa batean? Zergatik?

2021/12/17

BESTE URTE BAT!!!

365, bai, 365 egun pasa izan dira aurreko urtetik. Kontrakoa uste arren, 2021. urtea ez da aurrekoa baino luzeagoa izan, ezta laburragoa ere. Urte bisustuek izan ezik, beste guztiek egun berberak dituzte. Gurea da luzeagoa edo laburragoa izatearen kontua, gure  pertzepzioa: gauzak txarto badoaz, luzeagoa, eta, ondo badoaz laburragoa. Erlojuaren orratzak mugitzen dituenak (kabroi horrek), ez dakit nik, apropos egiten bide du.

Urtea nolakoa izan den aztertzeko garai honetan, ziur aski denetarik izan dugula esango genuke. Egun asko dira eta denetarik izaten dugu. Baina, oraingo honetan, urtea bukatzear dagoen honetan,  zuek gauza onak bakarrik gogoratzea nahi dugu eta, horregatik, urtean gertatu zaizuen onena gurekin partekatzeko gonbit egiten dizuegu. Eta, bide batez, hurrengo urteari zer eskatzen diozuen esan.

2021/12/03

EUSKARARI BURUZ ALA EUSKARAZ

Gaur EUSKARAren eguna da eta, lehen bezala, gehiago hitz egiten da euskarari buruz euskaraz baino. Ez dakit zenbat urte pasatu beharko diren egoera aldatzeko, baina, horrela jarraitzen badugu, datorren mendean ere berdin egongo gara, berdin berdin.

Sarrera honetan ez dizuet esango niretzat euskara zer den. Uste dut aurreko sarrera askotan argi utzi dudala eta ez duela gauza bera esatea merezi. Orain zuek esan behar duzue zer den zuentzat, zergatik ikasten duzuen, eta ditxosozko hizkuntza eskakizunak beharko ez bazenituzte ikasiko zenuketen ala ez.

Bukatzeko, nahiko nuke zuek partekatzea euskaraz bizi izan duzuen unerik zoriontsuena edo dibertigarriena edo barregarriena, azken baten, euskaraz bizi izan duzuen unerik gozoena.

2021/11/19

BUUUUUUUUUA!!!

Eeeeeeeh, ez dakit helduko naizen. Buuuuuuuuuuua! Bai, bai , helduko naiz. Hartu arnasa, baina, ikasleek diotenez, sabelatik… Nola demontre egiten da hori? Sudurretik eta … nahikoa da. Une honetan ez dakit ezta arnasa hartzen ere. Azkar, azkar, bestela soinean egingo dut. Buuuuuua! Etxeko atariko atea ikusten dut. Lasai. Berriro hartu arnasa. Ez naiz helduko, kauguen!!! Lorategia! Lorategia!

Buuuuuuua! Txakurrak bezala, baina ezin nuen gehiago. Sentitzen dut, baina ez nuen beste aukerarik.

Ez zait ondo iruditzen kalean txiza egitea, baina noiz edo noiz, beste erremediorik ez dagoenean, egin egin behar da. Buuuuuuua! Zer ondo geratu naizen!!!

Zer deritzozue kalean txiza egiteari? Debekatuta egon beharko luke? Zer zigor jarri zenikoke kalean txisa egiten duenari? Argazkikoa? Beste bat?

2021/11/05

BAT ALA BI IZAN?

Aste osoa daramat eta oraindik ez dakit,… sorpresa izatea nahi dut, baina zaila da, oso zaila da. Opari bat aukeratzea ez da kontu erraza, ez; baina, are zailagoa da oparia zeure buruari  egin nahi diozunean. Eta, esan dudan bezala, sorpresa… ez dut uste.

Kontua da datorren astean, azaroak 11n, ezkongabeen eguna dela eta eguna ospatzeko neuri buruari zerbait erostea pentsatu dudala, baina ez dakit zer. Interneten begiratu dut zer opari erosi eta, egia esaten badizuet, “ezkongabeentzako opariak” idatzi dut eta… bueno, badakizue zer opari motak agertu zaizkidan, ezta? Berdin dit, oraindik badut denbora pentsatzeko eta neure buruari opari ona egiteko.

Oparia dela eta, asko pentsatu dut ezkontzaz edo ezkondu gabe egoteaz. Pentsatu dut nola dauden ezkondu diren lagunak eta, argi daukat, hobeto nago ni. Hobeto alde guztietatik, fisikoki zein mentalki. Ez nago gaztetan bezala, baina ezkonduta dauden lagunak baino askoz hobeto bai.

Pena ematen dit ezkonduta dauden lagun batzuk ikusteak: nor izan ziren lehen eta nor diren orain. Askok galdu dute zeukaten alaitasuna eta kilo asko irabazi dute. Ezkongabeen gauzak kontatzen dizkiedanean, aho bete hortz geratzen dira, eta inbidia pixka bat sentitzen dute. Ziur nago. Baina, gau hotzetan ohean nagoenean, neuk ere inbidia izaten dut, baina ez diet esango, ez.

Zer iruditzen zaizue horrelako egunak ospatzea? Zein izango litzateke zeuen buruari egingo zenioketen oparia? Zergatik? Nola nahiago zenukete egon? Ezkongabe ala ezkonduta edo, jendea ezkontzen ez den garai honetan, izatezko bikotea izan edo, azken batean, beste batekin egon?

2021/10/22

TXIN TXIN!!! DIRUAREN HOTSA

 Askotan galdetu diot neure buruari zer sentitu behar den prezioa begiratu gabe gauzak erostean. Edozein dendatan sartu eta gustuko duzuna erosi, garestia zein merkea izan. Edonora bidaiatzeko ere kontuak egiten ibili beharrik ez, business bidaiatu, hotelik onenetara joan, suita hartu, … hori mauka hori! Kontu korrontean begiratzean digitu askoko zenbakiak ikustea, eta beste hainbeste gauza gehiago. Baina, zoritxarrez, langile xumeok garenok ezin ditugu gauza horiek egin. Gauzen prezioak ezinbestean begiratu behar ditugu hile bukaerara zenbaki gorritan heldu nahi ez badugu.

Segur aski batek baino gehiagok esango du beti esan ohi dena: diruak ez du zoriontasuna ematen. Agian bai, horrela izango da, baina diruak asko laguntzen du bizitza honetan aurrera egiteko. Eta apustu egingo nuke guztiok ikusi nahiko genituzkeela sei digitu baino luzeagoko zifra kontu korrontea begiratzean, ez al da horrela? Neu prest nengoke aberats baten bizitza egun batez edota aste batez bizitzeko, prezioak begiratu gabeko sentsazioa bizitzeko, zuek ez ala?

Gaiaren galderari erantzuna emateaz gain, beste galdera batzuk proposatzen dizkizuegu: Gustuko duzue erosketak egitea? Zein dira zuen erosteko ohiturak?

2021/10/07

AMETS BAT

Amets bat dut, bueno, amets asko ditut, baina ezagutzen nauzuenok badakizue amets bat dudala lanean. Ametsa polita bezain zaila. Agian horregatik da ametsa, betetzen zaila delako.

Hogeita hambi urte daramat lan honetan, hogeita hamabi urte amets berberarekin. Batzuetan hurbil izan dut, baina beste batzuetan urrun. Lortuko nuela pentsatzen nuenean, zapla!!!, desagertu egiten zen eta berriro beste urte bat zain.

Ez dakit erretiroa hartu aurretik lortuko dudan, horretarako ez zait asko falta eta. Baina ez dut amorerik emango eta aurten ere saiatuko naiz. Aurten ere nire ikasle guzti-guztiek gainditzea nahi dut, aurten ere espero dut ametsa betetzea.

Bestalde, bizitzan ere baditut ametsak.Txikiak eta handiak.Baina, bizitzan zoriontsua izatea da nire ametsa.

Eta zuek zer amets duzue? Zer dira ametsak zuentzat? Zein amets bete duzue?