71. EGUNA: AKELARREA PLAZAN

Oso haserre nago, sutan esango nuke. Hiru hilabete daramagu etxean sartuta, arau guztiak errespetatzen, zenbait kasutan senide edo lagun hurkoaren heriotza sufritzen eta, hara non, Beasaingo batzuei, hainbati hobeto esanda, bururatzen zaien herriko plazan elkartzea eta festa egitea, segurtasuneko distantziari kasurik egin gabe. 

Ez dago eskubiderik! Horrela egingo bagenu guztiok, ez dakit zer demontre gertatuko litzatekeen. Noiz hasiko ginateke normaltasunera bueltatzen guztiok herriko plazan elkartuko bagina distantzia errespetatu gabe? Inoiz ez, seguruenik.

Gainera, egin dutena hedabide guztietan agertu dela ikusita, barkamen eske hasi dira. Burugabe halakoak! Bizi dugun egoera honek guztion ardura eskatzen du, txiki, gazte, heldu, adineko guztiona. Guztiok ari gara pairatzen egoera eta guztiok nahiko genuke egoera honetatik kanpo egon, ezta? Baina errealitatea bestelakoa da, denok gaude itsasontzi berean eta lema norabide bakarrean gidatu behar dugu, bestela akabo.

Uda gertu dagoela, baten bati jaiak ospatzeko gogoa piztuko ote zaion beldur naiz. Ea orain arte egin duguna ezerezean geratuko ote den beldur naiz. Ea mundu guztiaren ahotan dabilen bigarren agerraldiak oraingoarekin bat egingo ote duen beldur naiz. 
 

Ikusi duzuenez, Beasainen gertatutakoak nire onetik atera nau, baina espero dut beste inork adibidea ez jarraitzea eta ez hastea orain udako ustezko jai guztietan segurtasuneko distantzia errespetatu gabe dantza egiten.

Zer deritzozue Beasainen gertatutakoari? Zergatik gara gizakiak hain burugabeak? Zer iruditzen zaizue aurten herriko jaiak bertan behera uztea? Zeintzuk dira gehien gustatzen zaizkizuen jaiak?

EMEKI EMEKI, EZ DAKIT

Poliki-poliki jaten ikasten ari naiz. Ez da erraza. Gauzak azkar baino azkarrago egin behar ditugun gizarte honetan ez da batere erraza, ez.

Astebete daramat, baina oraindik ez dut lortu. Oraindik platera begiratzen dut eta amen batean barrura, agian ez lehen bezain azkar, baina oraindik azkarregi.

Horretaz zerbait dakitenek motel jateak abantailak dituela diote. Osasuntsuagoa da eta, gainera, mokaduak gehiago eta hobeto disfrutatzen dituzu. Azkar jatea ez da edukazio onekoa. Mahaikideak eseri orduko dena irentsi baduzu, horiek ez dira familia on batean hezitako pertsona baten manerak. Horregatik, batez ere, saiatu naiz noiz edo noiz astiroago jaten.

Dena den, jateko orduan ditugun manerei buruz hitz egiten badugu, askoz txarragoa iruditzen zaizkit mahaikideak eseri orduko dena irensten dutenak, dena, hau da berena eta gurea jaten dutenak, besteok ezer gabe uzten gaituztenak. Beraz, kasu horietan ez egin inori kasurik eta jan azkar.

Nola jaten duzue? Zer manera iruditzen zaizkizue txarrak jateko orduan?

ZUBIAN GAUDE

Arraroa. Oso arraroa izan da atzean utzi dugun astea. Klasea, jaia, klasea, jaia eta gero klasea. Horrela ez dago lan egiterik. Inork ezin du lana behar bezala egin, ezta gu bezalako langile finek ere. Erritmoa hartu baino lehen, berriro jaia. Eta jaiaz gozatzen ari ginela, ernagailuak jo eta lanera. Horrela egun batean eta hurrengoan ere bai. Azkenean ez genekien zein egunetan bizi ginen edo, hobeto esan da, zer egun zen: laneguna ala jaieguna.

Hau ez gertatzeko aukera batzuk daude: jaiak kendu, aste osoa jai edo orain dela urte batzuk Espainiako gobernuak proposatu nahi izan zuena. Aurtengoa bezalako astea izan genuen eta, dirua aurrezteko aitzakiaz, jaiegun bi horietako bat mugitzea eta ostiralera edo astelehenera pasatzea bururatu zitzaion. Horrela, behintzat, haien ustez, ez zen aste osoa galduko, bakarrik lau egun. Geroago gobernu aldaketa etorri zen eta proposamena ezer ezean geratu zen.

Pasa den astea bezalako astea aurrean dugunean, ministro haren proposamena etortzen zait burura eta, egia esanda, ez dakit … igual proposamen ona zen.

Zuek, zer uste duzue ? Zer egin ahal da pasa den asteko bezalako asteetan? Nola sentitu zarete aste horretan?

ON KATU JAUNA, …

Gaur lau katu zeuden euskaltegiaren atean heldu naizenean.Lau katu, lau hankako lau katu, ez dut esan nahi jende gutxi zegoela, ez. Hortxe zeuden, atearen aurrean miauka. Euskaltegian sartu eta berehalaxe jakin dut zergatia: arrain usaina, gaur arraina izan dugu.  

Eguerdiko orduetan euskaltegia jantoki bihurtu dute eta etxera bazkaltzera joan nahi ez dutenek edo joan ezin direnek bertan bapo bapo bazkaltzen dute. Orain galdetu gabe badakit lankideek zer bazkaldu duten: lehenengo platera, bigarrena eta postrea. Kafea eta pattarra, beti bezala, ondoko tabernan. 

Behar ez dudalako izango da, baina ez naiz lantokian jatearen aldekoa. Lantokia lan egiteko da eta jantokia jateko, hitzek berek dioten bezala. Etxean lasai-lasai edo eguneroko menua jatetxe batean bazkaldu nahiago dut, aldez aurretik prestatutakoa mikrouhinean berotu baino. Pintxo ziztrin batzuk jatea ere ez dut gogoko. Hemengo pintxoek fama handia izango dute, mundialak izango dira, baina asteburuetan ardo on batek lagunduta ez bada, ez ditut nahi.

Zuek non bazkaltzen duzue? Pintxorik jatea gustuko duzue? Zer iruditzen zaizue lantokian bertan bazkaltzea edo bazkaldu behar izatea?

UDAKO JAIAK

Iñaki eta Lara ikasleek egindako sarrera.

Aurten Bilboko jaietara joango naiz. Oso jai onak dira, jende asko dago eta denetarik aurkitu ahal duzu. Ez naiz beste hiri bateko jaietara joango dirurik ez daukadalako. Baina, nire udako herriko jaietara bai eta alboko jaietan ere egongo naiz.

Herri txikietan guztiok ezagutzen dugu elkar, denok lagunak gara eta horrexegatik egiten dugu jaia nahi dugun moduan. Diru gutxirekin gauza asko egiten ditugu nire herrian, “Herramellurin” zurrakapotea ematen diogu jendeari txupinazoa eta gero eta perretxikoak ere bai.

Udan asko nabaritzen da jaiak daudela, jende asko dagoelako. Neguan bakarrik herrikoak daude. Zuen herrietan gauza berbera gertatzen da? Nolakoak dira zuen herriko jaiak?

JAIZ JAI

Sheila, Amaia eta Onelia ikasleek egindako sarrera.

Udan, asteburu guztietan herri bakoitzean jaiak daude. Batzuetan zaila da erabakitzen nora joan. Gainera, egunkarian jai inportanteenak baino ez dira ateratzen.

Jendea lehen Gasteizera joaten zen, gero Iruñera eta azkenean Bilbora. Hauek ziren, txirrindularitzan bezala, “Hiru handiak”. Gaur egun hau ez da pasatzen, bakoitza bere herrian geratzen da diru gutxi dagoelako.

Jaietako programazioak jende guztiarentzako gauzak dauzka, umeentzat, gazteentzat eta helduentzat. Niri gehien gustatzen zaidana janari lehiaketak dira. Hori egunez. Gauez kontzertuetara joatea gustatzen zait. Aukera onena da. Egon ahal zara edaten, musika entzuten era gero zure lagunekin parrandaz.

Zuek zer egiten duzue jaietan? Lehiaketetan parte hartzen duzue? Zer nahiago duzue, jai txikiak edo handiak?