GOXO-GOXO

Gaur egungo Aste Santua ez da beste garai batean izan zena. Oraindik jai erlijiosoa den arren, behintzat, horrela adierazten du izenak berak, ez da ospatzen duela hogeita hamar urte bezala eta kutsu erlijiosoa apurka-apurka ari da galtzen.

Orain eliza barruan ospatu beharrean, hondartza toallaren gainean eguzkitan ospatzen du jende askok. Umetan Aste Santua errezoetarako garaia zen. Egindakoaz hausnartzeko garaia. Bekatuak aitortzeko eta barkatzeko unea. Orain, berriz, ez.

Baina, Aste Santua ere bazen hainbat gozoki jateko astea, espresuki egun horiek ospatzeko gozokiak. Herri bakoitzak bazuen egun seinalatu hauetan bere gozokia eta etxe guztietan, denon parte-hartzearekin, egiten zen. Gozo-gozoak baziren ere, denon artean egiteak gozoago bihurtzen zituen.

Ni bezalako gozozale zaretenok gustuko izango dituzue garai honetako gozokiak eta, horrelakoak ez bazarete, ziur aski, zeuek ere izango duzue beste garai bateko baten bat.

Zein da gozoki hori? Gozozaleak zarete? Eta egiten, nola moldatzen zarete?

AMETSAK AMETSAK DIRA

Jende askoren ustez, nire lanean gauzarik onena oporrak dira. Ematen du potro jorran ibiltzen garela urtearen zati handi batean, oporrak baino ez ditugula. Eta egia da, beste lanbide batzuen aldean ezin gara kexatu. Udakoak, Gabonetakoak eta orain Aste Santukoak … guztira bi hilabete baino gehiago. Bueno, horiek eta egun solte batzuk ere bai.

Opor luzeak izatea guztion ametsa da. Oporretan bizitzea. Proportzioa txarto eginda dago, bi hilabete lan egin eta hamar opor izan beharko luke. Oporraldiaren amaieran lan egiteko irrikan egongo ginateke, ez litzateke opor osteko ajerik egongo. Baina ezinezkoa da, lan egin behar dugu oporrak izateko eta beste gauza guztiak ametsak baino ez dira.

Oporrak gauza asko egiteko garaia da, normalean egiten ez ditugun gauzak egiteko. Baina bereziki gauza baterako badira, hori bidaiatzeko da. Mundua oso handia da, leku desberdin askoz osatutako planetan bizi gara. Zuen ametsetako bidaia zein den galdetuko banizue, erraz egingo genuke zerrenda luzea. Baina nora ez zinateketen inolaz ere joango galdetuko banizue …

Opor luzeak izate guztion ametsa da? Zein izango litzateke opor proportziorik egokiena?

BALBOA

Opor garaia da Aste Santua. Lehen zuen zentzu erlijiosoa galdu bide du eta mezatara joan beharrean hondartzara edo mendira joateko aitzakia ezin hobea dugu orain. Otoitzak elizako bazter batean utzita, toalla hartuta hondartzara edo bota goretexdunak jantzita bideari ekin, igual, Aste Santua izanik, Santiagorako bideari.

Erabat aldatu da Aste Santua, erabat aldatu dugu. Lehen hemen geratzen ginen, gero herrira joaten ginen, beranduago Espainian zehar bidaiatzen genuen garaiko prozesioak ikusten eta orain, hegazkin bat hartuta, edonora joaten gara. Ez dago desberdintasunik Aste Santuko eta udako oporren artean, iraupenean ez bada. 

Berezia da beti opor garaia, batez ere, kanpoan gaudenean. Beste herrialde batean egoteak badu zerbait, aldatzen gaituen zerbait, bertakoa egiten gaituen zerbait. Edonon egonda hangoa egiten saiatzen gara, natiboak baino natiboagoak izango bagina bezala, sarritan barregarri geratu arren.

Oso sentsazio arraroa da gu oporretan egondako leku bat film batean ikustea. Eszena ikusi eta han egon garela esaten dugu berehala. Film horretako parte sentitzen gara. Baina berezia bezain barregarria da film batean ikusi genuena egitea bertan gaudenean. 

Arraroa bezain barregarria da Filadelfian egonda, Rocky Balboak korrika batean igotzen zituen eskailerak igotzea eta gora helduta besoak altxatzea. Eskerrak eskailera gutxi direla, bestela ez dakit nik … Eskailerak ikusi eta barruko indar batek bultzatzen du jendea eskailerak igotzera.

Bertan nengoela, neure burua kontrolatu nuen. Eskailerak igo nituen, banan banan, baina korrika ez. Ez nuen barregarri geratu nahi. Goian nengoela, besoak ez altxatzeko, eskuak patriketan eta listo. Ez nintzen frikia izan, beti bezala,  pertsona zentzuduna eta logikoa. Baina onartu behar dut eskailerak igotzen ari nintzela  TARI, TARA … entzuten nuela nire barnean. 

Holakorik ikusi duzue inoiz, hau da, oporretan jendea egiten filmetako edo telesailetako eszena xelebreenak? Eta zuek egin duzue inoiz halakorik? Zer uste duzue Aste Santuak duen zentzu berriaz? Ikusi duzue inon Aste Santua ospatzeko modu berezirik? Non? Nolakoa zen?

PAUSOZ PAUSO

Edu eta Yolanda V. ikasleek egindako sarrera.

Berehala Aste Santua egongo da gure artean. Nahiz eta hemen ohiturarik ez izan, baditugu gure prozesioak.

Hemengo prozesiorik famatuena Balmasedakoa da eta, urtero, jende pilo bat joaten da. Hor egiten dena antzerki handia bezalakoa da eta, horregatik, galdetzen diogu geure buruari ea zergatik joaten den jendea ikustera: fedeagatik, morboagatik …

Ez gara Balmasedako prozesioan inoiz egon, baina beste prozesio batzuk ikusi ditugu eta pixka bat aspergarriak direla uste dugu. Pauso batzuk oso tetrikoak dira eta soinuak oso gogorrak entzuteko. Hau dela eta, erabaki dugu prozesioak ez direla gure gustukoak.

Beste pertsona batzuek,ordea, gauza hauek egitea beharrezkoa dela uste dute, haien fedearekin bat egiteko. Horrela, belauniko ibiliz edo saeta bat abestuz, Jainkoak bekatuak barkatuko dizkiela edo haien nahiak beteko direla uste dute.

  

Inoiz egon zarete prozesio batean? Nolakoa izan zen? Sinesmenagatik ala ikuskizunagatik? Nolakoa da zure Aste Santua?

SANTU SANTUA

Alberto, Lorena eta Lmb ikasleek egindako sarrera.

Azkenean Aste Santua heldu da. Gabonetatik hiru hilabete eman dugu hori itxaroten, baina zergatik? Orain dela bi mila urte, Pazko-astean egun batean Jainkoaren semea hil eta birpiztu egin zen. Hori ospatzeko, Espainiako leku batzuetan diru asko gastatzen da: kofradiak, arropak, prozesioak... Krisi garai honetan zaila da estatu akonfesional batean hori onartzea. Egun horietan, kale guztiak hartzen dituzte katolikoek beren jaia ospatzeko. 

Estatu akonfesionala da gurea? Zer iruditzen zaizu hainbeste diru gastatzea jai horietan?