39. EGUNA: IRAGANARI BEGIRA

Gaur goizean esnatu naizenean “Regreso al futuro” filma etorri zait gogora. DeLorean hura gustuko hartuko nuke birus hau hasi zen lekura joateko eta agertu osteko amesgaizto hau desagerrarazteko. Izan ere, seigarren aste honetan gaudela, goizero esnatzean, ametsetan ote nagoen galdetzen diot neure buruari eta dudan erantzuna ez zait batere gustatzen. 

Dugun zorioneko egoera hau izan baino lehen, askotan pentsatu izan dut, ahal izanez gero, zein garaitara bueltatu nahiko nukeen. Betidanik erakargarriak iruditu zaizkit mendebaldeko filmak, bakeroak, indioak, legerik gabeko hiriak, zaldiz ibiltzea,… 

Ez dakit zergatik, agian, txikitan film hauek modan zeudelako, telebistan bi kanal bakarrik genuenean. Garai hartan bakeroak nituen gustuko, baina, orain, helduagoa naizela, indioei diet sinpatia handiagoa. Hori bai, garai hartara bueltatuko nintzateke dena zirrikitu batetik ikusteko, ez garai hartako protagonista izateko. Ez dut uste garai hartan bizirik mantentzeko gai izango nintzatekeenik! Kar, kar, kar,….

Ahal izanez gero, zein garaitara bueltatu nahiko zenukete? Zergatik? Uste duzue iraganera edo etorkizunera joatea posible dela ala zientzia fikzioa baino ez da?

TXERIFA HELDU DA HIRIRA

Txiki txikitatik gustatu izan zaizkit westernak. Umetan beti kartutxo-gerriko albo batean eta Colt-a eskuan ibiltzen nintzen kaletik. Auzoko azkarrena nintzen plastikozko pistola ateratzen, ez zegoen ni baino azkarragorik itsasadarreko alde honetan eta horrexegatik neraman Sheriffaren plaka.

Larunbat arratsaldeetan bazkal osteko pelikula ikusten genuen familiako guztiok, western bat, jakina. Pelikula amaitu, pistolan gezurrezko balak sartu eta kalera ateratzen nintzen. Dinbi-danba! Dinbi-danba! Pelikulako protagonistaren mugimenduak, poseak eta ahotsa imitatzen nituen.

Gero, gaztaroan, spaghetti westernak heldu ziren eta haiekin Clint Eastwood eta pontxoaren trilogia. Horrek dena aldatu zuen. “El bueno, el feo y el malo” ikusi nuen lehenengo aldian aho-zabalik geratu nintzen zinemako butakan. Filma bukatu zenean, dinbi-danba hasteko gogo ikaragarria izan nuen. Alde guztietara begiratu nuen zinemako atarian, baina neure burua kontrolatu nuen. Etxera heldu nintzenean, komuneko atea kisketaz itxi eta ispilu aurrean ikusi nuen oraindik ere banintzela itsasadarreko alde honetako azkarrena.

Aste honetan izan dira Oskarrak eta hori dela kausa dedikatu nahi dizkiogu aste honetako sarrerak zazpigarren arteari. Lehenengo sarrera honetan galdetu nahi dizuegu zein zine mota gustatzen zaizuen, zergatia, zein eszena duzuen gustukoen eta horren zergatia.