TXIN TXIN!!! DIRUAREN HOTSA

 Askotan galdetu diot neure buruari zer sentitu behar den prezioa begiratu gabe gauzak erostean. Edozein dendatan sartu eta gustuko duzuna erosi, garestia zein merkea izan. Edonora bidaiatzeko ere kontuak egiten ibili beharrik ez, business bidaiatu, hotelik onenetara joan, suita hartu, … hori mauka hori! Kontu korrontean begiratzean digitu askoko zenbakiak ikustea, eta beste hainbeste gauza gehiago. Baina, zoritxarrez, langile xumeok garenok ezin ditugu gauza horiek egin. Gauzen prezioak ezinbestean begiratu behar ditugu hile bukaerara zenbaki gorritan heldu nahi ez badugu.

Segur aski batek baino gehiagok esango du beti esan ohi dena: diruak ez du zoriontasuna ematen. Agian bai, horrela izango da, baina diruak asko laguntzen du bizitza honetan aurrera egiteko. Eta apustu egingo nuke guztiok ikusi nahiko genituzkeela sei digitu baino luzeagoko zifra kontu korrontea begiratzean, ez al da horrela? Neu prest nengoke aberats baten bizitza egun batez edota aste batez bizitzeko, prezioak begiratu gabeko sentsazioa bizitzeko, zuek ez ala?

Gaiaren galderari erantzuna emateaz gain, beste galdera batzuk proposatzen dizkizuegu: Gustuko duzue erosketak egitea? Zein dira zuen erosteko ohiturak?

27. EGUNA: DENOK BAT EGINIK

Noizean behin ilobak ekartzen dit ogia. Atzo, esaterako, ogia eta beste zer edo zer ere ekarri zidan. Lau etxetako erosketak egin behar dituela esan zidan, familiako lau etxetan. Supermerkatura zerrenda lau zatitan bananduta, etxe guztietarako gauzak erosten ditu. 

Seguru antzean, bera bezalako asko egongo dira bizi dugun egoera honetan, birus honek etxean egotera behartu dituen asko, adinekoak, konplikazioren bat dutenak,…laguntzen ari direnak. Egoera honek solidario egin gaitu, arazoak dituztenekin solidario egin gaitu. Atariko auzokide guztiekin solidario egin gaitu.

Egunero ospitaleetan gelditu gabe lanean ari direnekin solidario egin gaitu, ordu berean mundu osoko jendea txaloak jotzera ateratzen denean, haiek egindako lana eskertzera. Denok batera, elkar lagunduz lortuko dugu. Horixe da behin eta berriz elkarri esaten dioguna, iragarki guztietan esaten digutena, telefonoz hitz egitean elkarri esaten diogun mezua,…

Bizi dugun egoera honek solidario egin gaitu. Dena normaltasunera bueltatzen denean ere jarraituko ote dugu solidario izaten ala nork berea baino ez du begiratuko? 

25. EGUNA: MASKAREN DANTZA

Eraman behar dugu maskararik? Eraman beharko dugu maskararik kalera ateratzen hasten garenean? Ez dakit zuei, baina niri ez zait hau argi geratu eta, are gutxiago, egunkaria irakurtzen dudanean.

Gaurko egunkarian, adibidez, gurean oraindik jarraitzen dute bere erabilera arautu gabe. Italian, berriz, behartu dituzte hiritar guztiak erabiltzera eta, erabili ezean, 400 euroko isuna jarriko diete. Gainerako herrialdeek sekulako lehia dute zorioneko maskarak lortzeko, ez baitago eskaria asetzeko nahiko eskaintzarik. Adibidez, Frantziak Txinari erositako maskarak AEBera desbideratu zituzten estatubatuarrek, salmenta prezioaren hirukoitza edo laukoitza eskudirutan ordaintzea eskainita Txinako aireportuetan bertan.  Hau guztia estatubatuarrek ukatu egin dute, jakina!

Birus puta honek dena astindu du, mundu osoa eta mundu guztia etxean konfinatuta egotera behartu du, jende asko lanik gabe utzi du, maskarak eta arnasgailuak lortzeko herrialdeen arteko borroka piztu du, …

Baina gurean oraindik ez dakigu maskarak erabili behar ditugun ala ez. Gainera, erabili behar izanez gero, non erosiko ditugu inon ez badago? Zer iruditzen zaizue erabili behar izatea? Betiko edo denbora luzez erabili beharko genuke? Zer abantaila edo desabantaila dute maskarek? Adibidez, ligatzeko bestearen aurpegia ez dugu guztiz ikusten edo bere irribarrea...

23. EGUNA: EROSTEKO PANDEMIA

Dagoeneko laugarren astean sartu gara eta heltzen zaizkigun berriak era askotakoak dira, batzuetan baikorrak eta hurrengoan erabat ezkorrak. Bitartean, itxarotea besterik ez dugu. 

Baina, beti bezala egoera txarretan badira onuradun ateratzen direnak,  egoerari etekina ateratzen diotenak. Internet bidezko erosketei buruz ari naiz. Egunotan, zoritxarrez, normalean ez daukagun denbora dugunez, eskura ditugu hainbat web-orrialde edozer saltzeko prest. Adibidez, jendeak, sasoian egoteko kirola egiten duela jakinda, nonahi eta edonoiz ditugu kirola egiteko materiala saltzeko iragarkiak. Ume txikiak etxean egon behar direla aprobetxatuz, eskolako materiala saltzeko iragarkiak edo, ume txikien kasuan, eguneko ordu luzeak entretenituta pasatzeko jokoak. Eta horrela etxeko guztiekin.

Nire kasuan, egunero kuxkuxeatzean ditut halako web-orrialdeak eta  kostatzen zait tentazioari uko egitea, batez ere, ez dakidalako gero pakete horrekin nola jokatu behar dudan. Eskularruak jantzi?  Lixibaz garbitu bilgarria? Kar,kar,kar,… Bueno, bestelako arrazoiak ere badaude, jakina!

Udaberrian eta uda atarian gaudela ez dakit zer izango den salduko diguten hurrengoa. Bainujantziak? Eguzkirako krema? Sandaliak? Agian bai, baina hori erabiltzeko solariumak eta harea ere lotean egon beharko dira, zeren bestela …

Zer deritzozue berrogeialdi honetan Interneten bidez erosteari? Supermerkatuko erosketaz aparte, beste zerbait erosten duzue? Erraz eusten diozue erosteko tentazioari? Eta zer iruditzen zaizue pandemia aprobetxatzea negozioa egiteko?

MILA EUROKO EURO BAT

Horrelako hortz bat ere badu. Dena faltsua, dena kopia. Ez dena izan nahi du eta, orijinala erosteko beste diru ez duenez, kopiarekin konformatu behar. Euro bat ordaindu eta trukean mila euro balioko lukeen baten kopia etxera eraman. Negozio ederra!!!

Horrelaxe da gure mundua: dena faltsua, dena kopia. Txinatarrei botatzen diegu errua, baina erosten duenaren errua da. Ez dago aitzakiarik. Erosiko ez bagenitu, haiek ez lituzkete fabrikatuko. Baina, egia da edozer kopiatzeko gai ere badirela, den-dena kopiatzeko gai direla.

Aukeran orijinala nahiago dut. Onak izanda ere, kopiak kopiak dira. Ez dakit zergatik, baina kopia bat erosi dudanean, orijinalarekin alderatuta, ez dit ondo ematen. Aberats baten gorputzean jaio nintzen, nonbait. Eta, horregatik, ordezko hortzak ere urrezkoak ditut.

Zer deritzozue kopiak erosteari? Inoiz erosi duzue ezer? Zer? Noiz? Zergatik erosten ditu jendeak horrelako produktuak? 

EGUNAK ETA EGUNAK

Erosi eta erosi, zenbat eta gehiago erosi orduan eta zoriontsuagoak. Eta horretarako, espresuki, urtean zehar egun seinalatu batzuetarako asmatu dute zer edo zer. Betidanik egon diren erosteko datak gutxi izango balira bezala, gaur egun Ameriketatik ekarritako sasi-moda horiek ditugu: Black Friday edo Zibermonday.

Guk sakelei astindu ederra ematea dute helburu eta gutako askok, dagoeneko, zalantzan jartzen dugu erosteko data berri hauetan benetan maukarik dagoen ala aldez aurretik prezioak handitzen diren gero jaitsi egin dutela pentsarazteko, eta horrela ziria sartzeko. Batek daki!

Horretan argi daukat: itxaron ahal badut, itxaroten dut. Aurreko egunetan edo asteetan hasten naiz begiratzen eta prezioak konparatzen. Badakit zer erosi nahi dudan eta, arrantzan bezala, pazientzia baino ez da behar. Arrainak inguruan daude eta tzast! saskira. Kreditu txartela atera eta datozen asteetan etxean izango dut.

Baina,... ez dakit nik. Ez dakit arrain ederra harrapatu dudan ala arraina neu naizen. Eskerrak bi egun baino ez direla, behintzat, momentuz. Ez nuke esango laster Tuesday Berdea izango dugun edo merkathursday. Saldu eta saldu, zenbat eta gehiago saldu orduan eta zoriontsuagoak.

Zer deritzezue egun horiei? Erosten duzue? Merezi du? Zer beste egun proposatuko zenukete eta zer saltzeko edo erosteko?

MERKE, MERKE,…

Lehen ez nuen egiten. Lehen beti pentsatzen nuen ondo zegoela, akatsik ez zegoela. Orain beti begiratzen dut. Eman bezain pronto begiratzen dut akatsik dagoen bilatzeko. Joko bat dela ematen du, baina tartean dirua dagoenean joko bat baino gehiago da, batez ere, tartean dagoen dirua nire denean. Ez nago galtzeko prest. Larunbatero asteko erosketa egiten dudanean, ordaindu eta tiketa begiratzen dut. 

Xentimo bat hemen, beste xentimo bat hor eta deskuiduan pare bat euro han. Sarritan okertzen dira supermerkatukoak, sarritan beren alde okertzen dira, beti beren alde. Nire alde inoiz ez. Berdin dio zein den supermerkatua, guztietan gertatu zait gauza bera. Lehen behar nuen guztia erosteaz arduratzen nintzen, orain etxean prestatzen dudan zerrendan zutabe bat uzten dut prezioak ere apuntatzeko.

Gauza bera gertatzen zaizue? Inoiz zuen alde okertu dira? Gustuko duzue erosketak egitea? Noiz egiten dituzue? Zer deritzezue supermerkatuek guk gehiago erosteko erabiltzen dituzten teknikei?

EROSKETA DIBERTIGARRIAK

Berriro??? Hauxe izaten da bikotekideari egiten diogun galdera erosketak egin behar ditugula esaten digunean. Askorentzat, gehienontzat, erosketak egin behar izate hori asteko kalbarioa izaten da. Nekea, asperdura, eta, batez ere, amorrazioa eta haserrealdia sentitzen dugu une horretan. Beste batzuek, berriz, badakite, eta ondo gainera, nola disfrutatu une hori. Bestela begira hurrengo bideoa eta atera ondorioak.

Segur aski, zuek ez dituzue erosketak horrela egiten eta atarian esandakoarekin guztiz ados egongo zarete. Edozein kasutan ere, beheko komentarioetan esaguzue nola egiten dituzuen erosketak: prestatzen duzue zerrendarik? Kapritxoren bat erosten duzue? Gauzak erraz aurkitzen dituzue ala bueltaka eta bueltaka ibiltzen zarete pasilloetatik?...